ԱՄՆ նախագահի թեկնածուների առջև դնել Արցախի անկախության, սահմանի բացման հարցերը
Սա «Կալիֆորնիա կուրիեր» թերթի հրատարակիչ եւ խմբագիր Հարութ Սասունյանի տեսակետն է, որը նա արտահայտեց «Արմենպրես»-ի հետ զրույցում: Ամերիկահայ հրապարակախոսի դիտարկմամբ՝ տասնամյակներ ի վեր հայերը ամեն չորս տարին մեկ անգամ հանդիպում են ԱՄՆ նախագահի թեկնածուներին, խնդրում նրանց խոստում տալ, որ երբ նախագահ դառնան, կճանաչեն Հայոց ցեղասպանությունը: Դա, սակայն, հետագայում անարդյունավետ է լինում. ճնշումների ներքո նախագահները մոռանում են իրենց խոստումն, ու ամբողջ աշխատանքը ջուրն է նետվում: «Ընդհանրապես միայն ցեղասպանության հարցը չպետք է բարձրացնենք: Այն քանի անգամ ԱՄՆ Կոնգրեսն ընդունել է, Ամերիկայի նախագահն էլ ստորագրել է: Մենք ունենք բազմաթիվ հարցեր թե որպես ամերիկահայեր, թե ընդհանրապես հայեր: Մեր գլխավոր խնդիրները պետք է թեկնածուի առաջ դնենք, օրինակ, Արցախի անկախության, Թուրքիայի հետ սահմանի բացման, մեր պահանջատիրության հարցերը: Ինչու չէ նաև բարձրացնենք հարցեր՝ կապված Հայաստանին ու Արցախին տրամադրվող ամերիկյան օժանդակության մեծացման ու երկրի համար կարևոր պաշտոններում ամերիկահայերի նշանակման հետ: Մենք պետք է այս հարցերը սեղանին դնենք ու տեսնենք, թե որ թեկնածուն է մեր շահերին համապատասխան առաջարկներ անում ու որքանով են վստահելի այդ խոստումները»,-նշեց Հարութ Սասունյանը:
Հղում կատարելով իր վերջին հոդվածներից մեկին՝ հրապարակախոսը նկատեց, որ ԱՄՆ նախագահական ընտրությունների այս փուլում հայերը պետք է ոչ մի թեկնածուի կողքին չկանգնեն, այլ սպասեն ընտրապայքարի առավել թեժացմանը: «Պետք է սպասել, որ պայքարն ավելի թեժանա: Մոտենան նոյեմբերի ընտրությունները, որովհետև երբ թեկնածուներն իրար ավելի մոտ լինեն ձայներով, առավել նախանձախնդիր կլինեն մեզ առաջարկներ ներկայացնելու: Եթե մենք իրենց մոտ գնանք, մենք պետք է խնդրենք, աղաչենք, պաղատենք, իրենք մեզ միայն խոստում պետք է տան ու բան չանեն, բայց եթե իրենք տեսնեն, որ ամերիկահայության քվեները կարող են որոշիչ դեր կատարել իրենց ընտրապայքարում, իրենց շահը կլինի մոտենալ մեզ: Մենք պետք է մեզ թանկ ծախենք: Դեռ բավական ժամանակ կա»,-ընդգծեց Հարութ Սասունյանը: Անդրադառնալով փաստին, որ ԱՄՆ Հայ դատի հանձնախմբի նախաձեռնությամբ նամակ է ուղղվել նախագահ Օբամային Հայաստանի հետ երկակի հարկումը բացառող պայմանագրի կնքման խնդրով՝ Հարութ Սասունյանը նկատեց, որ բավականին կարևոր հարց է, քանի որ դա նաև կնպաստի Հայաստանում ամերիկյան ներդրումների ներգրավմանը: «Ամերիկահայ լոբբին աշխատանքներ է տանում է, որ Սպիտակ տունը, Կոնգրեսը դրական որոշում կայացնեն այս ողղությամբ: Ես վստահ եմ, որ ընտրություններից հետո այդ հարցն էլ կլուծվի, քանի որ իրենից դժվարություն չի ներկայացնում»,-հավելեց Սասունյանը:
Հետևեք մեզ Viber-ում
