Գործն արդեն չորս տարի է՝ քնեցված վիճակում է, ո՛չ տուժող կա, ո՛չ մեղադրյալ

Ադրբեջանցիների կողմից Սյունիքի մարզի սահմանային բնակավայրերի նկատմամբ ավազակային հարձակումներ իրականացնելու փաստի առթիվ հարուցված քրեական գործն արդեն չորս տարի է՝ քնեցված վիճակում է։

Ինչպես արդեն տեղեկացրել ենք՝ 2020թ նոյեմբերի 9-ին Նիկոլ Փաշինյանի կողմից կապիտուլյացիոն ակտի ստորագրումից հետո առանց որեւէ փաստաթղթային ձեւակերպման Ադրբեջանի վերահսկողության տակ են հանձնվել մի շարք բնակավայրեր, իսկ հայ-ադրբեջանական սահմանը գծվում է «GPS»-ով, թեեւ առ այսօր պարզ չէ, թե որ քարտեզն է հիմք ընդունվելու դելիմիտացիայի ու դեմարկացիայի համար։ Անօրինական սահմանազատման աշխատանքների պատճառով ադրբեջանական վերահսկողության տակ են անցել նաև Սյունիքի մարզի Շուռնուխի տներից մի քանիսը, Կապանի ավտոճանապարհի մի մասը և մի շարք այլ վայրեր։ Սյունիքի մարզի սահմանային բնակավայրերի նկատմամբ ադրբեջանցիների կողմից ոտնձգությունների մասին ահազանգել են նաև համայնքների ղեկավարները։ Փաստաբաններ Արամ Օրբելյանը և Հովհաննես Խուդոյանը հանցագործության մասին հաղորդում են ներկայացրել՝ նշելով, որ ադրբեջանցիների գործողություններում առկա են նախ առնվազն ավազակային հարձակման հատկանիշներ, սակայն վարույթն իրականացնող մարմինը քրեական գործի հարուցումը մերժելու մասին որոշում է կայացրել՝ նշելով, որ դա ՀՀ իրավապահների ենթակայության ներքո չէ: Փաստաբանները սույն որոշման դեմ բողոք են ներկայացրել դատարան, որը Երևանի ընդհանուր իրավասության դատարանի դատավոր Արմինե Մելիքսեթյանի կողմից բավարարվել էր: Հատկանշական է, որ, թեև դատարանը կայացրել էր, այսպես ասած, հայանպաստ որոշում, իրավապահ մարմինները՝ ի դեմս դատախազության, հրաժարվել էին քրեական գործ հարուցել՝ վիճարկելով դատական ակտը։ Այդուհանդերձ, բողոքարկման արդյունքում դատական ակտը չի բեկանվել, մտել է օրինական ուժի մեջ, ինչի արդյունքում քրեական գործ, ի վերջո, հարուցվել է։

Քննչական մարմիններում, սակայն, քրեական գործը սառեցված վիճակում է մնում, արդեն չորս տարի է, ինչ սայլը տեղից չի շարժվում՝ ո՛չ տուժողների շրջանակ է հստակեցվում, ո՛չ քրեական հետապնդում հարուցվում՝ ադրբեջանցիների նկատմամբ։

ՔԿ-ից «Փաստինֆո»-ի հետ զրույցում հայտնեցին, որ քրեական գործը հարուցվել է ՀՀ քրեական օրենսգրքի (2003թ․) 329-րդ հոդվածի 2-րդ մասի հատկանիշներով, այն է՝ պետական սահմանն ապօրինի հատելը, որն իրականացվել է՝ մի խումբ անձանց կողմից նախնական համաձայնությամբ կամ կազմակերպված խմբի կողմից կամ բռնություն գործադրելով կամ դա գործադրելու սպառնալիքով։ ՔԿ-ից նշեցին, որ քրեական վարույթով նախաքննությունը շարունակվում է, քրեական գործի շրջանակներում որևէ անձի նկատմամբ քրեական հետապնդում չի հարուցվել, որևէ անձ տուժող չի ճանաչվել։

Հեղինակ՝ Իզաբել Սահակյան

Աղբյուր՝ Փաստինֆո