Ինչո՞ւ Հայկազ Բաղմանյանը չի պատժվում թույլ տված թերացումների համար

Հայաստանում ընտրություններն իդեալական չեն, սակայն յուրաքանչյուր ընտրություն նախորդից տարբերվում է իր որակով: Այս մասին այսօր նշեց արդարադատության նախարար Դավիթ Հարությունյանը՝ անդրադառնալով ԵԱՀԿ/ԺՀՄԻԳ-ի վերջնական եզրակացությանը Հայաստանում կայացած խորհրդարանական ընտրությունների մասով: «Ես չեմ կարող ասել մի երկիր, որտեղ ընտրություններն իդեալական լինեն»,- ասաց նա՝ ընդգծելով, որ իշխանությունները ջանքերը կենտրոնացնում են նշված թերությունները վերացնելու վրա: Այնուհետև, Դավիթ Հարությունյանը՝ անդրադառնալով պաշտպանության նախարար Վիգեն Սարգսյանի այն հայտարարությանը, ըստ որի ԶՈՒ Գլխավոր շտաբի պետի տեղակալ Հայկազ Բաղմանյանը իր հորդորով զեկուցագիր է գրել և ազատվել պաշտոնից աշխատանքում ունեցած թերացումների պատճառով, ասաց, որ տեղեկություններ չունի այդ հարցի հետ կապված: Դիտարկմանը, որ ՀՀ զինված ուժերի գլխավոր շտաբի պետի արդեն նախկին տեղակալ Հայկազ Բաղմանյանը մեկ անգամ չէ, որ հայտնվել կոռուպցիոն սկանդալում, ինչո՞ւ են նրան միայն ազատել աշխատանքից և չեն պատժել, Հարությունյանը պատասխանեց. «Խոսակցությունները բավարար հիմք չեն, որ քննարկենք այդ հարցը։ Եթե մեկին հայտնի են փաստեր, կոռուպցիայի դեմ պայքարը դա էլ ենթադրում է, որ խիզախություն ունենա դրանք տալ։ Աշխատանքի թերացումների համար աշխատանքից ազատելը տեղի է ունենեում ամեն օր, այդ թվում արդարադատության նախարությունում։ Դա չի նշանակում, որ ամեն թերացումից հետո պիտի սկսել քրեական հետապնդում»: