Ռոմանոսը Փաշինյանի համար ապօրինի քաշած հոսանքի լար է...

Իշխանությունը հզոր գործիք է, որը տրվում է մարդու ձեռքը։ Այդ գործիքը կարող է օգտագործվել և՛ ի չար, և՛ ի բարի։ Երանելի է այն ժողովուրդը, որն ունի այնպիսի ղեկավար, որը պետական բոլոր լծակներն օգտագործում է ժողովրդի, երկրի բարօրության համար։ Նիկոլ Փաշինյանի «գերբնական ուժը չպետք է չափազանցացնել»․ նրա ձեռքն է տրվել պետական լծակների օգտագործման գործիքը։ Նա նմանվում է, չպարապած մարզիկի, ով ռինգ է մտել։ Մի քանի ,, տրյուկ գիտի,, և այդ տրյուկներով ձեռքի ուժը օգտագործում է պատահածի գլխին։ Եթե ինքը պարապած, հոգեբանական պատնեշները հաղթահարած լիներ, կիմանար, որ դա արենայից հեռանալու ամենակարճ ու ամոթալի ճանապարհն է։ Բայց քանի որ ինքը ձեռքում ունի այդ հզոր գործիքը, փորձում է դրանով անհաղթահարելիության տպավորություն ստեղծել։ Սկզբնական շրջանում դա կարող է տպավորություն գործել, բայց հետո այն թղթե տնակի պես կփլվի։ Վերցնենք վերջին օրինակը։ Ռոմանոս Պետրոսյանին նշանակել է Սամվել Կարապետյանից խլած ՀԷՑ-ի ժամանակավոր կառավարիչ։ Ռոմանոս Պետրոսյանը Փաշինյանի ձեռքին ընդամենը պետական լծակներն օգտագործելու լար է։ Օգտագործողը նա՛ է, նրա ձեռքու՛մ է իշխանությունը։ Նման լարերի միջոցով է նա պահում իր իշխանությունը՝ միաժամանակ պահելով նրանց գոյությունը։ Ու հիմա մամուլից, այլ աղբյուրներից իմանում ենք, որ Ռոմանոսը ,, աջ ու ձախ է անում,, , գործի է անցել ու բոլոր «անցանկալի» ղեկավարներին ազատում է աշխատանքից: Գիտե՞ք սա ինչ է։ Սա պարզ ցույց է տալիս, թե ինչքան կարևոր է Փաշինյանի համար՝ ցույց տալ, որ ինքը ուժ է, կա։ Նա չի կատարում արբիտրաժային դատարանի որոշումը, որովհետև դրանով ռոմանոսների մոտ կկորցնի անհաղթահարելիության ուժը, նրանք կարող են ,, խլվլալ,,, որ նա անհաղթահարելի՜ չէ։ Փաշինյանը չի կարող չիմանալ, որ դա երկար շարունակվել չի կարող, որովհետև Ռոմանոսը ապօրինի քաշած լար է։ Բայց բնական պիտի ընդունել, որ հիվանդը, երբ գիտե, որ իրեն մնացել է ապրելու համար ընդամենը մի օր, ավելի ամուր է կառչում այդ մի օրից։ Ինչքան երկարում է այդ պրոցեսը, այնքան շատ ապօրինի քաշած լարեր են ավելանալու ու կաթվածահար անելու ողջ երկիրը, տնտեսությունը։ Այս ամենի մեջ զավեշտալին այն է, երբ Փաշինյանը ռոմանոսների համար մնում է անհաղթահարելի ուժ։ Ընդամենը նրանց պետք է հիշեցնել, որ Փաշինյանի ձեռքին պետական լծակների կառավարման հզոր գործիք կա և Տերը այդ գործիքի հետևից գալու՛ է շուտով, որովհետև տեսնում է, որ այն ի չար է օգտագործվում։

Հասմիկ Բաբաջանյան

«Հրապարակ օրաթերթ»