Սյունիքի դարպասները Անգլիայի թագուհու դագաղը չէ, որ սելֆի անես ու շատախոսես
Վահագն Խաչատուրյան պաշտոնյայի գոյության մասին իմացանք, երբ 2022 թվականի սեպտեմբերին մասնակցում էր Անգլիայի թագուհու թաղմանը։ Հիշեցինք, որ մենք նախագահ ունենք։ Ցավոք, նա հայտնվեց Մեծ Բրիտանիայի միջազգային սկանդալի կիզակետում և միջազգային ԶԼՄ-ների գլխագրերում։ Բրիտանական առաջատար ու հեղինակավոր ԶԼՄ-ները ֆիքսել էին Խաչատուրյանին ՄԲ թագուհի Եղիսաբեթ Երկրորդի դագաղի մոտ լուսանկարվելիս, մի վայրում, որտեղ լուսանկարվելն արգելված է։ Նա հպարտ կանգնել էր, իսկ իսկ նրան լուսանկարում էր ՄԹ֊ում ՀՀ դեսպանը։ Հոդվածներում նշվել է, որ նա ոչ միայն լուսանկարվել է, այլև բարձր շատախոսել է՝ առաջացնելով ներկաների զարմանքը։ Ես սա պատահական չեմ հիշեցնում։ Նախագահի գոյության մասին հիշում ենք մեկ էլ Սյունիքի մասին նրա հայտարարությունից հետո։ Նույն գործելաոճն է։
Հիշեցնենք, որ նա եռօրյա աշխատանքային այցով Սյունիք էր գնացել, խորհրդակցություն է արել, որին մասնակցել են Սյունիքի մարզպետ Ռոբերտ Ղուկասյանը, տարածքային կառավարման և ենթակառուցվածքների նախարար Դավիթ Խուդաթյանը, ուժային կառույցների ներկայացուցիչներ և մարզի համայնքների ղեկավարներ։ Խորհրդակցության ժամանակ հայտարարել է․ «Սյունիքը մեր զարգացման դարպասներն են դառնալու։ Եթե մենք կարողանում ենք Սյունիքի դարպասները բացել, ես նկատի ունեմ 43 կմ հնարավորությունը, ուրեմն վստահ եղեք, որ ապագան զարգացման առումով շատ մեծ հնարավորություններ է մեզ տալու»։
Հիշեցնեմ Վահագն Խաչատուրյանին, որ Սյունիքի դարպասները Անգլիայի թագուհու դագաղը չէ, որ սելֆի անես ու շատախոսես․․․ Թմկա տիրուհին չես, որ խրախճանք կազմակերպես ու մի գիշերվա մեջ բացես դարպասները։ Հիշենք տողերը․ Վե՜ր կացեք, վե՜ր, հարբեցրել է Իր հաղթական հյուրերին, Բաց է անում դուռն ու դարպաս Ձեր դավաճան տիրուհին։ Մի ոգևորիր ու խաբիր Սյունիքին։ Խրախճանք մի կազմակերպիր։ Սյունիքի դարպասների բացումը զուր չեմ նմանեցնում Անգլիայի թագուգու դագաղի հետ նկարահանմանդ։ Կարմիր գծեր կան, որոնց շուրջ լռում են՝ իմանալով, որ դա անգամ խոսակցության թեմա լինել չի կարող։ Մեր քաղաքական գործիչներին խնդրում եմ, որ տարրական, շատ պարզ միջոցներով «հանկարծ հիշել է , որ նախագահ է» մարդուն հակադարձել, որ Սյունիքի դարպասների բացումը Անգլիայի թագուհու դագաղի հետ սելֆի անելը չէ, որ մոռացվի։ Խոսքը մի մարդու թաղման մասին չէ, խոսքը ողջ Սյունիքի մասին է։ Իշխանության ներկայացուցիչների հայտարարությունները և խորհրդակցությունները նմանեցնում եմ դավաճան Թըմկա տիրուհու խաբեությանը։
Հասմիկ Բաբաջանյան
«Հրապարակ օրաթերթ»
Հետևեք մեզ Viber-ում
