«Ծառուկյան» խմբակցության պատգամավորը մատնանշում է ծեծված մեծահարուստ կանանց
«Ծառուկյան» խմբակցության պատգամավոր Լուիզա Սարգսյանը Ազգային ժողովում լրագրողների հետ զրույցում ասաց, որ «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքի նախագիծը ծայրահեղության հասած մարդկանց, ծայրահեղ իրավիճակում գտնվողների համար է և, որ ինքը կողմ է քվեարկելու դրան: «Օրենքը չի պատրաստվում մտնել ընտանիք, այլ նոր ձևաչափեր են մշակվելու, որոնք կարող են նպաստել ընտանիքում բռնությունների նվազմանը: Հայաստանում այսօր մի շարք դժբախտ դեպքեր ունենք, եւ գուցե եթե ոստիկանությունը, քրեական օրենսգիրքը, Մարդու իրավունքների պաշտպանի գրասենյակը միաձայն խոսեին այն մասին, որ նրանց բոլոր գործիքակազմերը բավարարում են այս խնդիրները լուծելու համար, միգուցե նման օրենքի անհրաժեշտություն չառաջանար»,-ասաց նա: Խոսելով բռության և սոցիալական վատ պայմանների կապի մասին՝ կարծիք հայտնեց, որ մեծահարուստ ընտանիքներում ևս կանայք ենթարկվում են բռնության: «Եղել են դեպքեր, որ նրանք բարձրաձայնել են այդ մասին ու այնքան են ծեծվել, որ արդեն վեցերորդ անգամ տանում են պլաստիկ վիրահատություն»,- նշեց Լուիզա Սարգսյանը:
Հետևեք մեզ Viber-ում
