«Որևէ աթոռ ու պաշտոն չի խանգարում դրան». Վահրամ Բաղդասարյան

ՀՀԿ խմբակցության ղեկավար Վահրամ Բաղդասարյանը խորհրդարանում 2018 թվականի բյուջեի նախագծի քննարկման ժամանակ անդրադարձավ ընդդիմադիրների քննադատություններին՝ մասնավորապես «Ելք» խմբակցության ղեկավար Նիկոլ Փաշինյանի ելույթին: «Ելույթների մեծ մասում հիմնականում անդրադարձ էր կատարվում ընտրություններին: Ցավով պետք է նշեմ, որ այս ելույթները պետք է լինեին կամ նախընտրական, կամ հետընտրական շրջանում: Եվ եթե դուք բոլորդ հիշում եք, շատ մեծ գոհունակություն էին արտահայտում բոլոր այն քաղաքական ուժերը, որոնք այդ արգելքը հաղթահարել էին և եկել ԱԺ: Ընտրությունների ժամանակ որևէ քաղաքական ուժի, վստահված անձի կողմից չի եղել որևէ բողոքարկում: Հետընտրական որևէ պրոցեսներ, ցույցեր ու միտինգներ չեն եղել: Այսինքն՝ բոլորը գոհ էին իրենց արդյունքներից: Իսկ ինչ մնում է ընտրակաշառքներին, ես խնդրում եմ՝ բոլորդ մոնիտորինգ արեք և տեսեք, թե ում ռեսուրսներն ինչքան էին, և որտեղից էին դրանք, եթե դուք խոսում եք իշխանության ռեսուրսների մասին, ապա ասեք՝ ձեր ռեսուրսները որտեղի՞ց էին, որ կարողանում էիք այդ ձայներն ապահովել»,- ասաց նա: Անդրադառնալով ներդրումների մասին քննադատություններին՝ ասաց, որ եթե որևէ քաղաքական ուժ ցանկանում է մասնակցություն ունենալ երկրի զարգացմանը, որևէ աթոռ ու պաշտոն չի խանգարում դրան: