Հայրն ու մայրն են որոշում, թե տղեն ու հարսը ինչ դիրքով սեքս անեն. Նիկոլ Փաշինյան

ԱԺ-ում «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքի նախագծի քննարկման  ժամանակ ԱԺ «Ելք» խմբակցության ղեկավար Նիկոլ Փաշինյանն այսօր հայտարարեց, որ մեր երկրում աղավաղված է ընտանեկան արժեք հասկացությունը: «Հիմա, եթե ընտանիքի անդամը սպանում է ընտանիքի անդամին, պետությունը, հանրությունը միջամտելու իրավունք ունի՞, թե՞ չունի: Բնականաբար, ունի, այն ոչ մեկ չի վիճարկում: Իսկ եթե ընտանիքում սկսվել են պրոցեսներ, որոնք անխուսափելի են կամ մեծ հավանականությամբ բերելու են սպանության, կամ բերելու են վերակենդանացման բաժանմունք, էս դեպքում մենք անելիք ունե՞նք, թե՞ չունենք: Առաջին դեպքում ասում ենք` հա՛, բա, սպանել է, էս դեպքում ասում են` բա մեր ազգային, ընտանեկան ավանդույթնե՞րը: Ժողովո՛ւրդ ջան, մեր ազգային, ընտանեկան ավանդույթները որո՞նք են` եկեք մի հատ նայենք: Մեր ազգային ավանդույթները հայրը եւ մա՞յրն են, ովքեր որոշում են, թե տղեն ու հարսը շաբաթը քանի՛ անգամ են սեքսով զբաղվելու եւ ի՛նչ դիրքով, է՞դ ա մեր ազգային ավանդույթը, դուք գիտեք, որ նման բաներ կան  Հայաստանում»,- ասաց Փաշինյանն ու հավելեց, որ այս օրենքում կան հակասություններ, որոնք պետք է ճշգրտվեն, նոր ընդունեն: Ըստ Փաշինյանի ՀՀԿ-ն այս օրենքն  ընդունում է, որպեսզի Բրյուսելում բոսին ասի`  ընդունեցինք: