ԵԽԽՎ նախագահն Ադրբեջանում հանդիպել է քաղբանտարկյալի հետ

Ադրբեջանական Turan լրատվական գործակալության փոխանցմամբ՝ պաշտոնական այցով Բաքվում գտնվող ԵԽԽՎ-ի նախագահ Պեդրո Ագրամունտն այցելել է թիվ 2 գաղութ, ուր հանդիպել է «Հանրապետական այլընտրանք» շարժման առաջնորդ Իլգար Մամեդովին։ Ագրամունտն այդ մասին գրել է Twitter-ի միկրոբլոգում՝ հրապարակելով այդ հանդիպման լուսանկարը։ Ագրամունտը գրել է. «Այսօր հանդիպեցի դատապարտյալ Իլգար Մամեդովի հետ։ Շարունակում ենք աշխատել նրա հարցի լուծման ուղղությամբ»։ Իլգար Մամեդովն ու Թոֆիգ Յաղուբլուն դատապարտվել են 7.5 տարվա ազատազրկման՝ 2013 թվականի հունվարի 23-24-ին Իսմայիլիի զանգվածային անկարգությունները կազմակերպելու մեղադրանքով։ Երկու քաղաքական գործիչներն էլ հերքել են իրենց մեղքը։ ՄԻԵԴ-ը 2014 թվականի մայիսին ճանաչել է Իլգար Մամեդովի իրավունքների խախտումները մի շարք հոդվածներով։ Իլգար Մամեդովը ճանաչվել է որպես «խղճի բանտարկյալ»։