Իշխանությանը պետք է, որ ՀՀ քաղաքացին 10 հազար դրամին կակա ասի. Նիկոլ Փաշինյան

Հայաստանի Հանրապետական կուսակցությունը չի ցանկանում, որ բնակչության կենսամակարդակը բարելավվի, քանի որ հակառակ դեպքում վերջինս ընտրություններում հաղթանակ չի տանի: Այս մասին այսօր` դեկտեմբերի 6-ին, ԱԺ 2018 թվականի բյուջեի նախագծի քննարկման ժամանակ ասաց «Ելք» խմբակցության պատգամավոր Նիկոլ Փաշինյանը: «Հանրապետական կուսակցությունը վերջին ընտրություններում 700 քանի հազար ձայնի 90 տոկոսը ստացել է ընտրակաշառքով, 10 հազար դրամը տվել են, ձայնը ստացել են: Հիմա որեւէ մեկը կարո՞ղ է բացատրել, թե ինչի էս խորհրդարանական մեծամասնությունը պետք է ուզի, որ ժողովուրդը ավելի լավ ապրի քան հիմա: Չպիտի ուզենա, որ մարդը լավ ապրի, որովհետեւ եթե մարդը լավ ապրեց, 10 հազար դրամը իր համար մեծ գումար չի լինելու, որ ինքը գնա վազելով հանրապետականի համար քվեարկի»,-ընդգծեց Փաշինյանը: «Էս իշխանությանը հարկավոր է, որ ՀՀ քաղաքացին  10 հազար դրամին կակա ասի, որ ինքը ընտրություններում հաղթի»,-ասաց պատգամավորը: «Հաջորդ տարին, միանշանակ, լինելու է թանկացումների տարի։ Սա ընդունում է նաև կառավարությունը, որովհետև կառավարության ներկայացրած բյուջեի նախագծով գնաճը կանխատեսվել է չորս տոկոս։ Սա վերջին տարիների գնաճի ամենաբարձր կանխատեսումն է», - հայտարարեց Փաշինյանը։ Ավելին, պատգամավորի խոսքով, արդեն այսօր մի շարք ապրանքատեսակներ թանկացել են՝ կարագը թանկացել է շուրջ 39 տոկոս, խոզի միսը՝ 40 տոկոս, տավարի միսը՝ 20 տոկոսով, բենզինը՝ ութ տոկոսով և այլն։ Հաջորդ տարվա թանկացումները, ընդդիմադիր պատգամավորի խոսքով, անխուսափելի են նաև Հարկային օրենսգրքով սահմանված առանձին հարկատեսակների բարձրացման ու նաև Մաքային նոր օրենսգրքով ընդունված նոր մաքսավճարների պատճառով։ «Եվ այսպես, հաջորդ տարի սպասվում է սեղմված գազի, բենզինի, հավի մսի, օղու, ծխախոտի, շաքարավազի, բուսական յուղի, ատամի մածուկի և բազմաթիվ այլ ապրանքների թանկացում», - հայտարարեց Փաշինյանը՝ ընդգծելով, որ կառավարությունը այս ամենի նկատմամբ «խորը արհամարհանք է դրսևորում»։