Պուտինի՝ Երևանին և Բաքվին չկասկածելու գինը

ԵՄ և «Արևելյան գործընկերության» որոշ երկրների նպատակ ունեն օգտագործել այդ ձևաչափը հակառուսական նպատակների համար, դա անհեռանկարային է, հայտարարել է Ռուսաստանի արտգործնախարար Սերգեյ Լավրովը: «ԵՄ-ի մեջ մտնող որոշ երկրների մոտ ցանկություն կա օգտագործել «Արևելյան գործընկերությունը» հակառուսական նպատակներով: Նրանք շատ չեն, բայց իրենց բավականին ագրեսիվ են պահում: Դա արտահայտվեց, այդ թվում, մի քանի օր առաջ Բրյուսելում «Արևելյան գործընկերության» գագաթնաժողովում Մեծ Բրիտանիայի վարչապետ Թերեզա Մեյի ելույթում»,- ասել է Լավրովը: Նրա խոսքով՝ «ԵՄ երկրների ճնշող մեծամասնությունը հասկանում է, որ դա կլինի հերթական փորձը անպիտան միջոցներով», և «հակառուսական խայծ գցել ԱՊՀ անդամ-երկրների հետ ցանկացած հարաբերություններում՝ անարդյունավետ է և անհեռանկարային»: «Մենք, իհարկե, տեսնում ենք՝ ինչպես են իրենց պահում մեր ուկրաինացի, մոլդովացի և վրացի գործընկերները: Բայց կրկնեմ ևս մեկ անգամ, նրանց չի հաջողվի, ես համոզված են, որ չի հաջողվի «Արևելյան գործընկերության» ամբողջ սխեման տանել հակառուսական հունով»,- ասել է Լավրովը: Այնուհետև Լավրովն ուշագրավ միտք է արտահայտել՝ նշելով. «Մենք բարձր ենք գնահատում Բելառուսի և «Արևելյան գործընկերության» այլ մասնակիցների կոշտ դիրքորոշումը նման փորձերի (հակառուսական քաղաքականություն իրականացնելու-խմբ.) դեմ»,- ասել է Լավրովը: Նրա խոսքով՝ Բելառուսը թույլ չի տվել հակառուսական տրամադրվածություն հաղորդել ԱլԳ ամփոփիչ հռչակագրին, և դա վկայում է այն մասին, որ նա ցանկանում է բնականոն հարաբերություններ ունենալ եվրոպական երկրների հետ: «Մենք որևէ կասկած չունենք Բելառուսի, Հայաստանի և Ադրբեջանի նկատմամբ»,- ասել է Լավրովը: Հայաստան-ԵՄ համաձայնագրի ստորագրումից հետո, այսպիսով, առաջին անգամ պաշտոնական Մոսկվան անդրադառնում է «Արևելյան գործընկերության» այլ մասնակիցներին: Մոսկվան, իհարկե, մի կողմից ձգտում է արևմուտքի հետ հնարավորինս բարելավել հարաբերությունները, բայց դա չի նշանակում, որ նա հաշտվելու է արևմուտքի ամրացմանը հետխորհրդային տարածքում: Միևնույն ժամանակ, Մոսկվան ԵՄ-ին ցույց է տալիս, որ հետխորհրդային որոշ երկրների և ԵՄ-ի հետ հարաբերություններին չի ընդդիմանում, քանի որ չի կասկածում այդ երկրների անկեղծությանը: Ու այստեղ Մոսկվան նշում է, թե ում չի կասածում Ռուսաստանի հետ հարաբերությունների նվիրվածության առումով՝ Բելառուս, Հայաստան ու Ադրբեջան: Ահա, Մոսկվան, ի դեմս Լավրովի՝ բացեց «թնջուկը»: Հարցականներ այլևս չկան, թե ինչպես ստացվեց, որ Ռուսաստանն այս անգամ չընդդիմացավ ՀՀ-ԵՄ համաձայնագրի ստորագրմանը: Հայաստանը, Ադրբեջանն ու Բելառուսը կկառուցեն ԵՄ-ի հետ հարաբերությունները, բայց երբեք դեմ հանդես չեն գա Կրեմլին, այսինքն, չեն անցնի անթույլատրելի «կարմիր գիծը»: Թամար Բագրատունի