«Պարոն Ալեքսանյանն ինչ-որ հրաշքով հեռակա քվեարկությանը մասնակցում է». Նիկոլ Փաշինյան

Ազգային ժողովում շարունակում են հերթական քառօրյա նիստերը: Օրակարգում  2018 թվականի բյուջեի նախագծի երկրորդ քննարկումն է, ընտանեկան բռնության վերաբերյալ օրինագիծը, մի շարք այլ օրինագծեր: Այսօր աշխատանքները սկսեցին քննարկված մի քանի օրինագծերի քվեարկությամբ, որոնք հիմնականում ընդունվում էին 7 դեմ 80 կողմ արդյունքներով, դեմ քվեարկում էին ԵԼՔ խմբակցության ներկայացուցիչները: «Ոստիկանության մասին ՀՀ օրենքում փոփոխություններ եւ լրացումներ կատարելու մասին օրենքի նախագծին», սակայն դեմ քվեարկող չեղավ, այն երկրորդ ընթերցմամբ եւ ամբողջությամբ ընդունվեց 92 կողմ 0 դեմ 0 ձեռնպահ արդյունքներով: Այս քվեարկությունից հետո, սակայն վարման կարգով ձայն վերցրեց ԵԼՔ խմբակցության ղեկավար Նիկոլ Փաշինյանը եւ հայտարարեց, որ ՀՀԿ պատգամավոր Սամվել Ալեքսանյանը դահլիճում չէ, բայց ինչ-որ հրաշքով հեռակա մասնակցում է քվեարկությանը: «Ելք» խմբակցության ղեկավար Նիկոլ Փաշինյանը հորդորեց ԱԺ նախագահ Արա Բաբլոյանին ՀՀԿ-ական պատգամավոր Սամվել Ալեքսանյանի քվեարկությունները չհաշվել, քանի որ նա դահլիճում չէ: «Խնդրում եմ արձանագրել, որ պարոն Ալեքսանյանը ներկա չէ, բայց ինչ-որ հրաշքով, հեռակա քվեարկությանը մասնակցում է: Խնդրում եմ՝ արձանագրություններում իր բացակայությունը ֆիքսեք: Քվեարկությունների 90 տոկոսն անցել ենք, այստեղ Ալեքսանյանը չի եղել, բայց ցույց է տալիս, որ քվեարկել է»,- հայտարարեց Ն. Փաշինյանը: Ա. Բաբլոյանը խոստացավ ուսումնասիրել: