«Սասնա ծռերի» գործով ամբաստանյալները լքեցին նիստը

Շարունակվում է դատավոր Արթուր Օհանյանի վարույթում գտնվող «Սասնա ծռերի» գործով Արամ Մանուկյանի և մյուսների դատավարությունը։ Մեղադրող դատախազը շարունակում էր մեղադրական եզրակացության հրապարակումը, երբ ամբաստանյալները հայտարարեցին, որ չեն ցանկանում լսել մեղադրանքը և ուզում են լքել նիստերի դահլիճը։ «Մենք հանցագործ չենք, ինչպես ներկայացվում է, և պետության դեմ այստեղ որևէ մեկը գործ չի կատարել», - հայտարարեց ամբաստանյալներից Արամ Հակոբյանը։ Նիստը նախագահող դատավորը բավարարեց ամբաստանյալների միջնորդությունը և թույլատրեց նրանց լքել նիստը։