Փաստաբանը միջնորդել է գլխավոր դատախազությանը անհապաղ ազատ արձակել Սուրեն Խաչատուրովին

ՌԴ-ում ադրբեջանցի գործարարի կողմից հետապնդվող և այժմ Երևանում՝ «Դատապարտյալների հիվանդանոցում», անազատության մեջ գտնվող Սուրեն Խաչատուրովին անհապաղ ազատ արձակելու կապակցությամբ նրա փաստաբան Նիկոլայ Բաղդասարյանը այսօր միջնորդություն է ներկայացրել Գլխավոր դատախազին: Բանն այն է, որ օրեր առաջ Մարդու իրավունքների եվրոպական դատարանը որոշել էր կասեցնել ՀՀ իրավապահների կողմից Սուրեն Խաչատուրովին ՌԴ իշխանություններին հանձնելու գործընթացը: Փաստաբան Նիկոլայ Բաղդասարյանի ներկայացմամբ, ՄԻԵԴ-ը հիշեցրել է իր որոշումը չկատարելու հետևանքները և ընդդեմ Թուրքիայի գործը, որի շրջանակում Թուրքիան չէր կատարել ՄԻԵԴ-ի պահանջը: Ներկայացնելով Խաչատուրովի նկատմամբ ՌԴ-ում հարուցված գործի նախապատմությունը՝ Բաղդասարյանն Aysor.am-ի թղթակցի հետ զրույցում տեղեկացրեց, որ Խաչատուրովը Մոսկվայում է եղել 1996-ից, աշխատել է տարբեր տեղերում, ունեցել տարբեր պաշտոններ: Լինելով համատիրության պետի տեղակալ՝ փաստաբանի փոխանցմամբ՝ նա նաև կարողացել է վերահսկողություն իրականացնել շինարարությունների նկատմամբ, տալ կամ չտալ թույլտվություններ: «Ինքը ինձ պատմել է, որ աշխատանքի ընդունվելուց հետո նկատել է բազմաթիվ խախտումներ ադրբեջանցի գործարար Թելման Իսմայիլովի շինարարական գործունեության մեջ: Իսմայիլովները բազմիցս սպառնացել են, թե կսարքեն Խաչատուրովի գլխին, և ինչ-որ անձ ցուցմունք է տվել իրավապահներին, թե փորձել են կաշառք տալ, բայց Խաչատուրովը աշխատասենյակում չի եղել, ինչի պատճառով չեն կարողացել կաշառք տալ: Արդյունքում փաստացի քրեական գործ են հարուցել, բայց մինչ այդ, ինքը կարողացել է շուտ գալ Հայաստան, և հիմա Հայաստանի իշխանությունները փորձում էին նրան հանձնել ՌԴ-ին, սակայն ՄԻԵԴ-ը կասեցրեց հանձնման որոշման իրականացումը», - ներկայացրեց փաստաբանը: Նիկոլայ Բաղադասարյանի խոսքով՝ ութ ամիս շարունակ պաշտպանական կողմը փորձում էր իրավապահներին բացատրել, որ անօրինական է առողջական վատ վիճակում գտնվող կալանավորին հանձնել այլ երկրի իրավապահներին, սակայն ապարդյուն. նրանց բողոքը երկու անգամ մերժել է Վերաքննիչ դատարանը, իսկ Վճռաբեկ դատարանը նույնիսկ վարույթ չի ընդունել այն: «Մարդը ակնհայտ առողջական վատ վիճակում է, սկզբում գտնվում էր քաղաքացիական հիվանդանոցում: Սակայն նրան ռուս իրավապահների ցուցումով կալանավորել են, ու առողջությունը կտրուկ վատացել է քննչական մեկուսարանում: Այժմ Խաչատուրովը «Դատապարտյալների հիվանդանոցում» է», - ասաց փաստաբանը: Բաղդասարյանը նաև տեղեկացրեց, որ Գլխավոր դատախազությանը միջնորդել է անհապաղ ազատ արձակել Սուրեն Խաչատուրովին, որին պահելու առավելագույն ժամկետը լրանում է դեկտեմբերի 11-ին: «Ես միջնորդում եմ անհապաղ ազատ արձակել, քանի որ մինչև դեկտեմբերի 11-ը ոչինչ չի փոխվի», - ասաց Բաղդասարյանը: