Դստեր նորածնին արտաքնոցի փոսը նետած տատը կալանավորվել է

Տավուշի մարզում ամիսներ առաջ դստեր նորածնին արտաքնոցի փոսը նետած տատը կալանավորվել է: 57-ամյա կնոջը մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով, և դատարանը որպես խափանման միջոց է նրա նկատմամբ ընտրել կալանավորումը: Այս ահասարսուռ դեպքը տեղի է ունեցել սեպտեմբերի 27-ին, 33-ամյա կինը արտամուսնական կապից հղիացել է վերջինիս մայրն էլ որպեսզի թաքցնի դստեր հղիությունը և նորածին երեխայի անցանկալի լինելու դրդապատճառով 36-38 շաբաթական հղիության ժամանակ ծնված նորածնի պարանոցի աջ և ձախ կողմնային երեսներից սեղմելու միջոցով մեխանիկական շնչահեղձության հասցնելով նորածնի դիակը փաթաթել է պոլիէթիլենային պարկի մեջ, ապա գցել արտաքնոցի փոսի մեջ: Հարուցված քրեական գործով նշանակվել է դատաբժշկական փորձաքննություն: Համաձայն որի եզրակացության՝ իգական սեռի պտուղը եղել է կենդանածին, հասուն ու կենսունակ և գտնվել է զարգացման 36-38 շաբաթական շրջանում։ Ավելի վաղ Քննչական կոմիտեն պաշտոնական հաղորդագրության հանդես գալով հայտնել է, որ ըստ դատաբժշկական փորձաքննության եզրակացության՝ «պտղի մահվան պատճառ է հանդիսացել մեխանիկական շնչահեղձությունը, որը պայմանավորված է պտղի պարանոցի օրգանների բութ, կոշտ առարկայով սեղմելու հետևանքը և որը հիմնավորվում է պարանոցի շրջանում փափուկ հյուսվածքների և ստորադիր փափուկ հյուսվածքների արյունազեղումներով, մեխանիկական շնչահեղձությանը բնորոշ թոքերի էմֆիզեմայով, միջալվեոլային պատերի պատռվածքով, բրոնխոսպազմով: Հայտնաբերված նման վնասվածքները կենդանի անձանց մոտ ունեն առողջության ծանր վնասի հատկանիշներ, որոնցով էլ պայմանավորված է մահը»,- նշված է եզրակացության մեջ։ Ըստ փորձագետների՝ վնասվածքներն առաջացել են շատ կարճ ժամանակահատվածում՝ րոպեներ առաջ: Քրեական գործով փաստական տվյալներ են ձեռք բերվել, որ նորածնին կյանքի հետ անհամատեղելի վնասվածքը պատճառվել է նորածնի տատի կողմից: Սպանության գործով նախաքննությունն ավարտվել է և այն արդեն դատարանում է:  

 Փաստինֆո