Ինչպես Արցախում, այդպես էլ հիմա՝ Իսրայելն անցել է ցեղասպանական գործողությունների․ ՄԻԱՍԻՆ շարժման հայտարարությունը

Հայաստանի դեմոկրատական կուսակցությունը և «Միասին» այլընտրանքային հասարակական-քաղաքական շարժումը խստորեն դատապարտում են Իսրայելի հանցագործ հարձակումն Իրանի Իսլամական Հանրապետության քաղաքացիական օբյեկտների և ենթակառուցվածքների վրա՝ որի հետևանքով կան մարդկային զոհեր և ավերածություններ։ Իրան-ԱՄՆ բանակցությունների նախօրեին նման հարձակումը գնահատում ենք իբրև սադրիչ և միջազգային հանրության դեմ ուղղված ոչ իրավաչափ քայլ, որը պետք է խստորեն դատապարտվի, որպեսզի կանխվեն տարածաշրջանային ռազմական հնարավոր ընդլայնվող բախումները։

Հիշեցնում ենք, որ 2020 թվականի սեպտեմբերի 27-ին Արցախի Հանրապետության դեմ Ադրբեջանի ծավալած ռազմական ագրեսիան, որին անթաքույց ռազմական աջակցություն էր ցույց տալիս Իսրայելը, և որն ավարտվեց ցեղասպանական գործողություններով ու բռնազավթված Արցախում ադրբեջանաիսրայելական ռազմական հենակետերի ստեղծմամբ, դրանք կարևոր օղակներ էին ընդդեմ Իրանի Իսլամական Հանրապետության ծրագրավորված մեկուսացման քաղաքական շղթայի։

Մեր անկեղծ զորակցումն ու ցավն ենք հայտնում Իրանի ողջ ժողովրդին կորուստների և ավերածությունների համար՝ ուժ և կորով մաղթելով բարեկամ պետությանը, լիահույս, որ իսրայելական այս ագրեսիան պատշաճ գնահատականի կարժանանա միջազգային հանրության կողմից և հնարավորինս շուտ կկանխվի։