Նեթանյահուն առաջին հայտարարությունն է արել Իսրայելի կողմից Իրանի վրա հարձակումից հետո

Իսրայելի հարձակման նպատակն էր հարվածել Իրանի միջուկային և ռազմական օբյեկտներին: Գործողությունը կշարունակվի այնքան ժամանակ, որքան անհրաժեշտ է: Այս մասին հայտարարել է Իսրայելի վարչապետ Բենիամին Նեթանյահուն իր ելույթում։

Իսրայելի վարչապետի խոսքով՝ գործողության նպատակն է հարվածել Իրանի միջուկային ենթակառուցվածքներին, բալիստիկ հրթիռների գործարաններին և ռազմական ներուժին:

Նեթանյահուն շնորհակալություն է հայտնել ԱՄՆ նախագահ Դոնալդ Թրամփին «նրա անսասան դիրքորոշման համար»: «Նա բազմիցս հստակեցրել է. Իրանին երբեք չպետք է թույլ տրվի ձեռք բերել միջուկային զենք», - ասել է նա:

Անմիջապես դիմելով Իրանի ժողովրդին՝ Նեթանյահուն ասել է. «Մենք ձեզ չենք ատում: Դուք մեր թշնամին չեք: Մենք ունենք ընդհանուր թշնամի՝ բռնակալական ռեժիմը, որը ոտնակոխ է անում ձեզ»:

Իսրայելի վարչապետը նաև ընդգծել է, որ Իրանի դեմ գործողությունը կշարունակվի այնքան ժամանակ, որքան անհրաժեշտ է: Իսրայելի պաշտպանության բանակը նախկինում հայտարարել էր, որ սա գործողության միայն առաջին փուլն է։ Լրատվամիջոցները հաղորդում են, որ այն կտևի մի քանի օր։