Քոչարյանի թիմից Անդրանիկ Թևանյանը օրերս հանդիպել է Կիրիենկոյին

Մեր տեղեկություններով՝ «Մայր Հայաստան» խմբակցության ղեկավար, Ռոբերտ Քոչարյանի թիմի անդամ Անդրանիկ Թևանյանը օրերս հրավիրվել էր Մոսկվա՝ Ռուսաստանի Դաշնության նախագահ Վլադիմիր Պուտինի աշխատակազմի ղեկավարի տեղակալ Սերգեյ Կիրիենկոյի հետ հանդիպման։

Ռուսական և հայկական մամուլում արդեն հրապարակումներ եղել են այն մասին, որ Հայաստանի հետ հարաբերությունների համակարգման պատասխանատվությունը ամիսներ առաջ դրվել է Կիրիենկոյի վրա։ Հայտնի է նաև, որ իր ռազմավարությունը Պուտինի նախկին օգնական, Ուկրաինայի և Մոլդովայի ուղղություններով պատասխանատվություն կրող Վլադիմիր Սուրկովի ռազմավարության ավելի նորացված տարբերակն է, ըստ որի՝ ակտիվ աշխատանք է տարվում տեղում ազգային-պահպանողական էլիտայի հետ՝ օգտագործելով նաև ռուսական «փափուկ ուժը»։

Անդրանիկ Թևանյանն ու «Մայր Հայաստանը» Ռուսաստանի համար ընկալելի ու հարմար գործընկերոջ համբավ ձեռք բերեցին Դոնբասի շրջան հրապարակայնորեն պատվիրակություն ուղարկելով, ինչպես նաև Ռոբերտ Քոչարյանի շնորհիվ․ ՌԴ-ի համար Հայաստանում ամենավստահելի քաղաքական գործիչ շարունակում է մնալ հենց Ռոբերտ Քոչարյանը։