Աբսուրդ․ ՊԵԿ-ից կոնյակագործներին զգուշացրել են
Մի քանի օր է՝ ինչ կոնյակագործները ահազանգում են, որ Հայաստանի մաքսային ծառայությունները անհիմն կերպով արգելակում են կոնյակով բեռնված բեռնատարների արտահանումը դեպի Ռուսաստան։
Հայկական կոնյակագործ ընկերությունները պնդում են, որ Հայաստանի մաքսային ծառայությունները չեն ձևակերպում Ռուսաստան արտահանման համար նախատեսված կոնյակով բեռնված բեռնատարների համապատասխան փաստաթղթերը։
Ըստ կոնյակագործների ներկայացրած տեղեկությունների՝ մաքսային մարմինները առանց որևէ իրավական պատճառաբանության մերժել են ձևակերպման գործընթացը՝ առաջարկելով բեռնատարների վարորդներին վերադառնալ 3-4 օր անց։ Նրանց որևէ գրավոր բացատրություն չի տրամադրվել։
Այսօր Պետական եկամուտների կոմիտեն պարզաբանում է տարածել, որի մեջ նշվում է, որ հաշվի առնելով վրացական անցակետերում վերջին օրերի կուտակումները՝ ՀՀ մաքսային ծառայությունը նպատակահարմար չի համարել հայկական բեռնատարների՝ հայ-վրացական սահմանի հատումը։
Սակայն, ինչպես մեզ է հայտնի դարձել, ՊԵԿ-ից կոնյակագործներին հատուկ զգուշացրել են, որ հինգ օր կոնյակ չարտահանեն, որպեսզի բեռնափոխադրումների կուտակումներն ավելի շատ չլինեն, քանի որ այդ դեպքում կուտակումներ կլինեն և բողոքի մեծ ալիք կբարձրանա։
Հիշեցնենք, որ կոնյակ արտադրող հինգ ընկերությունների ու բեռնափոխադրող կազմակերպությունների ներկայացուցիչները զգուշացրել էին, որ եթե իրենց խնդիրը չլուծվի, բողոքի ակցիաները շարունակելու են, քանի որ մինչ իրենց բեռները շարունակում են մնալ վրացական մաքսակետում, ադրբեջանական խմիչքներն են Ռուսաստանում վաճառվում։
Նշենք նաև, որ վրացական կողմն էլ մինչև այսօր պաշտոնական պատասխան չունի, թե ինչու են հայ կոնյակագործներն իրենց մաքսային տարածքում այսպիսի խնդիրների առաջ կանգնում:
Հետևեք մեզ Viber-ում
