Նիկոլ Փաշինյանը՝ Էրդողան-Ալիև զույգի սպասավոր
Նիկոլ Փաշինյանը շարունակում է սպասարկել թուրք-ադրբեջանական օրակարգը: Ընդ որում՝ ագրեսիվ ձևով:
Հայ Առաքելական Սուրբ Եկեղեցու դեմ նրա հարձակումներն այդ օրակարգի սպասարկման ծրագրի շրջանակներում են իրականացվում:
Ադրբեջանի հոգևոր առաջնորդ Փաշազադեի քննադատությունը, որն ուղղված է ՀԱՍԵ-ի դեմ, լոկ քննադատություն չէր: Դա ծրագրային ելույթ էր: Ելույթ, որի հիմքում հայկական պետականության վերացման թեզն էր: Ըստ Փաշազադեի՝ երբ հայկական պետությունը վերացվի, Հայ Առաքելական Սուրբ Եկեղեցին կարող է դիմադրության օջախ դառնալ այդ գործընթացում: Ուստի, ըստ ադրբեջանցի հոգևորականի, հայկական եկեղեցին պետք է կազմաքանդվի:
Նիկոլը Փաշազադեի ասածները որպես հրահանգ և աշխատանքային ցուցում է ընկալել ու անցել գործի: Թիրախում մեր եկեղեցին ու անձամբ Ամենայն Հայոց Կաթողիկոսն է:
Իրականացվում է շատ կեղտոտ քարոզ: Մտնում են մարդու անձնական տարածք՝ թաքնվելով բարեվարքության պահպանման ջատագովի քողի տակ: Իրականում դա փարիսեցիություն և լկտիություն է:
Նիկոլի բուն նպատակները հասկանալով՝ բացարձակապես կապ չունի, թե որ եկեղեցականն ինչ անձնական կյանք ունի (եթե դա այլասերվածություն կամ մանկապղծություն չէ): Այստեղ հարցը Կաթողիկոսն ու որևէ սրբազանը չեն: Հարցն ավանդական մեր ինստիտուտի դեմ հարձակումն է, ինչը պետք է լուրջ դիմադրության արժանանա:
Պարզ է, որ Նիկոլին բացարձակապես չի հետաքրքրում եկեղեցու, այսպես ասած, մաքրությունը: Ինքը Կաթողիկոսի դեմ հարձակվում է, քանզի Գարեգին Բ-ն միջազգային հարթակներում բարձրաձայնում է արցախահայության իրավունքների, ադրբեջանական ագրեսիայի, հայ ռազմագերիների ու պատանդների մասին: Սա՛ է պատճառը, որ Նիկոլը հիշել է կուսակրոնության մասին: Որպեսզի դուր գա իր թուրք-ադրբեջանական տերերին և սպասարկի նրանց հակահայկական օրակարգը:
Եկեղեցին այս պայմաններում պետք է կոչ անի հայ ժողովրդին կանգնել Հայ Առաքելական Սուրբ Եկեղեցու կողքը և թույլ չտալ մեր դարավոր ինստիտուտի փլուզում՝ դեմ գնալով թուրք-ադրբեջանական օրակարգի կյանքի կոչմանը:
Կորյուն Մանուկյան
Հետևեք մեզ Viber-ում
