Յուրաքանչյուր անպատասխանատու կամ վիրավորական խոսք՝ ուղղված զոհված զինվորների հիշատակին, առաջին հերթին դատապարտում է հենց խոսողին. Հովակիմ Սրբազան
Մեծ Բրիտանիայի և Իռլանդիայի հայոց թեմի առաջնորդ Գերշնորհ Տ. Հովակիմ եպիսկոպոս Մանուկյանը գրել է.
««Քո խոսքով արդարացած կլինես, և քո խոսքով էլ պիտի դատապարտվես» (Մատթեոս 12:37)
Երբ խոսում ենք մեր զոհված զինվորների, հայրենիքի պաշտպանների և նահատակված սերնդի մասին, մեր խոսքը պետք է լինի խոնարհ, արժանապատիվ և երախտագիտությամբ լեցուն։ Այդ հողը սրբացել է նրանց արյամբ։ Յուրաքանչյուր անպատասխանատու կամ վիրավորական խոսք՝ ուղղված նրանց հիշատակին, առաջին հերթին դատապարտում է հենց խոսողին։
Խոսքը լույս է կամ խավար։ Թող մեր խոսքը դառնա լույս՝ սրտերից ծնված ճշմարտություն՝ ի փառս Աստծու և ի զորություն Հայրենիքին։
Եվ երբ սրբապղծության ու արհամարհանքի լեզուն բարձրանում է նահատակների հիշատակին, այդ խոսքն արդեն իսկ դատապարտում է իր արտաբերողին՝ մերկացնելով նրա հոգևոր դատարկությունը»։
Նշենք, որ երշնորհ Տ. Հովակիմ եպիսկոպոս Մանուկյանն ուղեկցել է Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսին Շվեյցարիայում՝ Բեռնում, որտեղ Եկեղեցիների համաշխարհային խորհուրդը (ԵՀԽ) և Շվեյցարիայի Բողոքական Եկեղեցին մայիսի 26-28-ը կազմակերպել էին «Կրոնական Ազատություն․ հայկական հոգևոր, մշակութային և պատմական ժառանգության պահպանումը Արցախում/Լեռնային Ղարաբաղում» խորագրով միջազգային համաժողով։ Մայիսի 27-ին համաժողովը բացվել է Ամենայն Հայոց Կաթողիկոսի օրհնությամբ և ուղերձով։
Հիշեցնենք, որ այսօր Նիկոլ Փաշինյանի կինը Աննա Հակոբյաը գրել էր. «Շվեյցարիայում ի՞նչ եք անում. ո՞ւմ եք անվտանգ ուղարկում հարազատ բնօրրան, ո՞ւմ եք անհապաղ ազատում գերությունից։ Դուք գիտե՞ք` հոգևորն ինչ է։ Ա՜յ քեզ նորություն։ Երկրի գլխավոր հոգեւոր մաֆիոզն ակնհայտորեն վրդովմունքի մեջ է ընկել, որ չուլաններից խոսակցություն է բացվել. թե չէ՝ ինչո՞ւ պետք է հարձակվեին պետության՝ ընտրված ղեկավարի վրա»։
Հետևեք մեզ Viber-ում
