Երգչի հայտարարության հետքերով. Ձերբակալված ճանապարհային ոստիկաններից մեկը կալանավորվել է

Ճանապարհային ոստիկանների կողմից կաշառք վերցնելու մասին երգիչ Սեբու Սիմոնյանի հայտարարությունից հետո ձերբակալված ՃՈ ավագ տեսուչներից մեկին՝ Հայկազ Գրիգորյանին, մեղադրանք է առաջադրվել, և նա կալանավորվել է, Aysor.am-ին այդ մասին ասաց Հատուկ քննչական ծառայության մամլո խոսնակ Մարինա Օհանջանյանը: Նրա փոխանցմամբ, ՃՈ աշխատակցին մեղադրանքն առաջադրվել է ՀՀ քրեական օրենսգրքի 311 հոդվածի հատկանիշներով՝ «պաշտոնատար անձի կողմից խոշոր չափի կաշառք ստանալը»: Ձերբակալված ՃՈ մյուս տեսուչի նկատմամբ դեռ մեղադրանք չի առաջադրվել և նա դեռ շարունակում է կալանավոված մնալ: Ավելի վաղ Aysor.am-ը տեղեկացրել էր, որ ոստիկանության հասարակայնության հետ կապերի բաժնի պետ Էդգար Ջանոյանի փոխանցմամբ, երգիչի հայտարարության հետքերով ՀՀ ոստիկանության պետի հանձնարարությամբ ներքին անվտանգության վարչությունում նշանակվել է ծառայողական քննություն, որի ընթացքում պարզվել է Ս․ Սիմոնյանի հոր ավտոմեքենան կանգնեցրած տեսուչների ինքնությունը։ «Նրանց արարքներին քրեաիրավական գնահատական տալու համար ծառայողական քննության ընթացքը կասեցվել է, նյութերն ուղարկվել ՀՀ Հատուկ քննչական ծառայություն», - տեղեկացրել էր Ջանոյանը: Երեկ դեպքի վերաբերյալ մանրամասներ էր հայտնել՝ տեղեկացնելով, որ ՀՀ ոստիկանության «Ճանապարհային ոստիկանություն» ծառայության ավագ տեսուչներ Տ. Խաչատրյանն ու Հ. Գրիգորյանը, վարորդի սթափությունը ստուգելու նպատակով, Երևան քաղաքի Մաշտոցի պողոտայում կանգնեցրել են Հ. Սիմոնյանի կողմից վարվող «Կիա» մակնիշի ավտոմեքենան: Վարորդից տեղեկանալով, որ նախորդ օրն ալկոհոլ է օգտագործել, վերջինիս սթափության վիճակը չստուգելու, ապա նաև` վարչական իրավախախտման համար համապատասխան արձանագրություն չկազմելու համար, ՃՈ տեսուչներն ընդունել են մեքենայի ուղևորի կողմից կաշառքի առաջարկը: Այդ ոստիկանները, կաշառք ստանալու դիտավորությամբ, նախնական համաձայնությամբ, ավտոմեքենայի ուղևոր Լ. Բաղդասարյանից ստացել են 56.800 ՀՀ դրամին համարժեք 100 եվրո կաշառք և թույլատրել շարունակել երթևեկությունը: