ԱՆ աշխատակիցների երեխաներին պատվաստել են, իսկ ո՞վ ասաց, որ պատվաստել են, ո՞վ տեսավ. Մելիտա Հակոբյան

Հայաստանի սպառողների ազգային ակադեմիայի նախագահ Մելիտա Հակոբյանն այսօր Հայելի ակումբում տարակուսանք հայտնեց ԱՆ աշխատակիցների երեխաներին պատվաստելու հարցում: «Ասում են՝ ԱՆ աշխատակիցների երեխաներին պատվաստել են, իսկ ո՞վ ասաց, որ պատվաստել են, ո՞վ տեսավ։ Դուք ձեր աչքով տեսե՞լ եք պատվաստանյութը, սերտիֆիկատը նայե՞լ եք։ Ես կասկած ունեմ, որ դա խարդախություն էր։ Ես առաջարկում եմ, որ ԱՆ աշխատակիցները, որ այդպես պաշտպանում են, թող իրենց երեխաներին, թոռներին մեր ներկայությամբ պատվաստեն, ես ոչ ոքի չեմ վստահում»։ Բանաստեղծ, հրապարակախոս, հասարակական գործիչ Ռուզաննա Ասատրյանն էլ ուշադրություն է հրավիրում ան հանգամանքի վրա, որ «Գարդասիլի» կիրառման բնութագիրը հայերեն չի թարգմանվել. «Երբ ԱՆ-ին հարցրինք, թե ինչո՞ւ չկա հայերեն թարգմանությունը, պատասխանեցին, որ, երբ պատվաստումները սկսվեն, նախորդ օրը կհասցնեն։ Ե՞րբ են հասցնելու 16 հազարին։ Երկրորդ՝ նախարարը հայտարարեց, որ 16 հազար աղջիկների պետք է պատվաստում անեն․ դա կամավո՞ր սկզբունքով է, թե՞ կամավոր-պարտադիր։ Ինչպե՞ս են պատվաստում 16 հազարի, երբ ՀՀ Սահմանադրության 17-րդ հոդվածն արգելում է որևէ անչափահաս երեխայի պատվաստանյութ ներարկել»։