Որեւէ այլ երկրում նման փորձեր անող իշխանություններին ծաղրի կենթարկեին, կսուլեին ու կճանապարհեին տուն

Հրապարակ օրաթերթի գլխավոր խմբագիր Արմինե Օհանյանը ֆեյսբուքի իր էջում գրել է.

Անհնար է պատկերացնել ավելի շատ ոչ պրոֆեսիոնալիզմ, հիմարություն, մարտնչող տգիտություն, պետության ու հասարակության հանդեպ ավելի մեծ վնասարարություն, քան այսօր իրականացնում է ՔՊ-ական իշխանությունը` տարբեր ոլորտներում: Անհնար է որեւէ երկրի իշխանության մեջ պատկերացնել այսքան շատ պաշտոնյաներ, որոնք լիքը տարրական բաներ չգիտեն, երբեմն անգամ բարձրագույն կրթություն չունեն եւ իրենց ղեկավարած ոլորտներից բացարձակապես անտեղյակ են, բայց կառավարում են: Բայց այդ բոլոր քաղաքակիրթ երկրներում, որտեղ լավ կրթություն ու դաստիարակություն ստացած մարդիկ են կառավարում, ոչ մի պաշտոնյա իրեն թույլ չի տա հայտարարել, թե հանրությունը տգետ է` պետք է նրան կրթել: Առավել եւս՝ իրեն թույլ չի տա լսարաններ հավաքել, դասախոսություններ կարդալ, իրենից խելացի ու գրագետ մարդկանց սովորեցնելու առաքելություն ստանձնել, մանավանդ՝ երբ երկրում կան բազում կրթական հաստատություններ եւ կան կրթվելու, սովորելու բոլոր հնարավորությունները՝ եթե մարդը ցանկություն ունի։ Նման պահվածքն ինքնին մովետոն է, քաղաքակիրթ դեմոկրատական երկրներին անհարիր: Որեւէ այլ երկրում նման փորձեր անող իշխանություններին ծաղրի կենթարկեին, կսուլեին ու կճանապարհեին տուն: Նման իշխանությունը չէր համարձակվի ընտրությունների գնալ եւ քվե խնդրել այն մարդկանցից, ում ինքը համարում է տգետ եւ ում ուզում է կրթել։ Ե՞րբ, ո՞ր պահից այս ամենը մեզանում հնարավոր դարձավ: Ե՞րբ բաց թողեցինք լկտիանալու հակված այս իշխանության դեմն առնելու պահը: Ինչպե՞ս եղավ, որ իշխող ուժի ներկայացուցիչները սկսեցին քամահրանքով, վերամբարձ խոսել ժողովրդի հետ, դասեր տալ ու արհամարհել նրան։ Գուցե այն պահին՝ երբ ԱԺ ամբիոնի մոտ հայտնված, 7 մանդատ ունեցող ուժի ղեկավարը բացահայտ սպառնալիքների միջոցով փորձում էր վարչապե՞տ ընտրվել: Կամ՝ այն պահին, երբ իր համար անցանկալի դատավճռի պատճառով կոչ էր անում մարդկանց` շրջափակել դատարանների դռնե՞րը: Կամ` երբ ուզում էր սահմանադրական հանրաքվե անել` ՍԴ-ի` իրեն չենթարկվող դատավորներից ազատվելու համա՞ր: