ԿԺԴՀ-ի հրթիռային արձակման թեմայով ՄԱԿ-ի ԱԽ-ն արտահերթ նիստ կգումարվի

Նյու Յորքի ժամանակով ժամը 16:30-ին (Երեւանի ժամանակով նոյեմբերի 30-ի 01:30-ին)  ՄԱԿ-ի Անվտանգության խորհուրդը  արտահերթ նիստ կանցկացնի՝ քննարկելու ԿԺԴՀ-ի կողմից անցկացված հերթական հրթիռային փորձարկումը: Նիստն անցակացնելու պահանջով դիմել են ԱՄՆ-ը, Ճապոնիան եւ Կորեայի Հանրապետությունը «ի պատասխան Հյուսիսային Կորեայի կողմից միջմայրցամաքային բալիստիկ հրթիռի փորձարկման»,հայտնել են  Ամերիկյան դիվանագիտական ներկայացուցչությունում : ԱՄՆ-ի նախագահ Դոնալդ Թրամփը եւ Ճապոնիայի վարչապետ Սինձո Աբեն հյուսիսկորեական հրթիռի փորձարկումից հետո կայացած հեռախոսազրույցի ընթացքում հավաստել են ԿԺԴՀ-ից բխող սպառնալիքի դեմ պայքարելու իրենց հանձնառությունը: Ինչպես ասված է Սպիտակ տան տարածած հայտարարության մեջ, «երկու ղեկավարները համաձայնել են, որ հյուսիսկորեական ռեժիմի սադրիչ գործողությունները խարխլում են նրա անվտանգությունը եւ նրան էլ ավելի են մեկուսացնում միջազգային հանրակցությունից»: ՄԱԿ-ի գլխավոր քարտուղար Անտոնիու Գուտերիշն «ամենայն վճռականությամբ» դատապարտել է ԿԺԴՀ-ի կողմից անցկացված հրթիռային փորձարկումը եւ կոչ է արել Փենյանին՝ ձեռնպահ մնալ տարածաշրջանի իրադրությունն ապակայունացնող հետագա քայլերից: