Ինչու է ծեծի ենթարկած թաղապետը ազատության մեջ, իսկ գնահատականներ հնչեցրած Լիլիթ Աղեկյանը կալանքի տակ. Աննա Գրիգորյան

Ո՞նց է ստացվում, որ ծեծի ենթարկած թաղապետը շարունակում է լինել ազատության մեջ, իսկ մյուս անձը, ով ընդամենը գնահատական է հնչեցրել՝ կալանքի տակ է։ Այս մասին ԱԺ-ում ՔԿ նախագահ Արթուր Պողոսյանին հարցրեց «Հայաստան» խմբակցության պատգամավոր Աննա Գրիգորյանը մատնանշելով Սամվել Վարդանյանի և Լիլիթ Աղեկյանի գործերը։

«Քննչական վարույթներ նախաձեռնելիս ես տեսնում եմ ակնհայտ երկակի ստանդարտների իրագործում և նաև ակնհայտ քաղաքական ենթատեքստ՝ հարուցված քրեական գործերի շրջանակներում։ Երբ Սամվել Վարդանյանը ՔՊ-ական պատգամավորին ավտոբուսում գնահատականներ է հնչեցնում ու դրան անմիջապես հաջորդում է Վարդանյանի ձերբակալումն ու կալանավորումը, բայց երբ Մասիվի թաղապետը օրը ցերեկով տեսախցիկների առջև ծեծի է ենթարկում քաղաքացու՝ դա որևէ հետևանք չի ունենում։ Նույնը Լիլիթ Աղեկյանի դեպքում է, ինչի համար էր հարկավոր նման այդ կերպ կալանավորել։

Ո՞նց է ստացվում, որ ծեծի ենթարկած թաղապետը շարունակում է լինել ազատության մեջ, իսկ մյուս անձը, ով ընդամենը գնահատական է հնչեցրել՝ կալանքի տակ է»։

Արթուր Պողոսյանն արձագանքեց, որ այն արարքը, որ մեղսագրված է Նոր նորքի թաղապետին՝ ոչ մեծ ծանրության հանցագործություն է։ «Այսինքն, մենք հիմա քրեական վարույթներով չենք կարող մատնանշել մեկ քրեական վարույթ, երբ առաջին անգամ ոչ մեծ ծանրության հանցագործություն կատարած անձին ձերբակալեն»։
Անդրադառնալով Լիլիթ Աղեկյանին՝ նա նշեց, որ լրագրողի վերաբերյալ բազմաթիվ վարույթներ են առկա թե դատարանում, թե նախաքննության փուլում։ «Մենք ի սկզբանե անազատության հետ չկապված խափանման միջոց ենք կիրառել։ 1 գործով, 2 գործով, 3 գործով, երբ ընտրում ես անազատության հետ կապված խափանման միջոց և տեսնում ես, որ այդ խափանման միջոցը չի չեզոքացնում այդ անձի ոչ պատշաճ դատավարական վարքագիծը՝ վարույթն իրականացնող մարմինը գնում է ծայրահեղ քայլի։ Դա արվել է, քանի որ անձը դպրոցում խուլիգանություն է կատարել անչափահաս երեխաների մասնակցությամբ և նկատմամբ, նա ամբողջ դպրոցի բնականոն գործունեությունը կազմալուծել ու կազմաքանդել է անձնական շարժառիթնեով,ապա նաև խաթարել է դատական պրոցեսը և դատավորին վիրավորել է։ Մենք ստիպված ենք գնացել այդ ծայրահեղ խափանման միջոցի»,-ասաղ Պողոսյանը։