Ողբերգական վթար. հարսանիքից վերադառնալիս մահացել է երկու ոստիկան

Երեկ՝ նոյեմբերի 26-ին, խոշոր եւ ողբերգական ավտովթար է տեղի ունեցել Գեղարքունիքի մարզում: Ժամը 22:00-ի սահմաններում, Սեւան-Մարտունի-Գետափ ավտոճանապարհի 16-րդ կմ հատվածում, ճակատ-ճակատի բախվել են «Mercedes» մակնիշի 41 NX 001 համարանիշի եւ «Nissan Qashqai» մակնիշի 19 ՕՕ 048 համարանիշի ավտոմքենաները:Ինչպես հայտնում է Shamshyan.com-ը, վթարի հետեւանքով 2 հոգի տեղում մահացել է, 2 հոգի՝ մարմնական վնասվածքներով տեղափոխվել է Սեւանի բժշկական կենտրոն: Հիվանդանոցից ֆոտոլրագրողին հայտնել են, որ 2-ն էլ գտնվում են ծայրահեղ ծանր վիճակում:Դեպքի վայր ժամանած՝ մահացածների հարազատները ասում էին, որ նրանք աշխատում էին ոստիկանության Մարտունու բաժնում եւ վերադառնալիս են եղել հարսանեկան արարողությունից:Նոյեմբերի 27-ի՝ ժամը 9:40-ի դրությամբ, կայքը տեղեկացրել է, որ Սեւանի ոստիկաններն ու քննիչները պարզել են, որ Mercedes-ը վարել է Գեղարքունիքի մարզի Ներքին Գետաշեն գյուղի բնակիչ, 25-ամյա Մարատ Կիրակոսյանը, Nissan-ը վարել է Երեւան քաղաքի Ազատության պողոտայի բնակիչ, 57-ամյա Արմեն Կիրակոսյանը: Վթարի հետեւանքով Mercedes-ի վարորդ Մ. Կիրակոսյանը, ուղեւոր, Գեղարքունիքի մարզի Աստղաձոր գյուղի բնակիչ, 28-ամյա Գրիգոր Կարապետյանը տեղում մահացել են, Nissan-ի վարորդ Ա. Կիրակոսյանը տեղափոխվել է Գավառի բժշկական կենտրոն, իսկ նրա ուղեւոր, Երեւան քաղաքի Եղիշե Թադեւոսյան փողոցի բնակիչ, 56-ամյա Կարեն Մամիկոնյանը տեղափոխվել է Սեւանի բժշկական կենտրոն, որտեղից էլ՝ Երեւանի Սուրբ Գրիգոր Լուսավորիչ բժշկական կենտրոն:Պարզվել է, նաեւ, որ մահացածներից Մ. Կիրակոսյանը աշխատում էր Ոստիկանության Գեղարքունիքի մարզային վարչության, Ոստիկանության Մարտունու բաժնում՝ որպես ձերբակալվածների պահման վայրում ոստիկան, կոչումով՝ Ոստիկանության կրտսեր սերժանտ էր, իսկ Գ. Կարապետյանը աշխատում էր Ոստիկանության Գեղարքունիքի մարզային վարչության, Ոստիկանության Մարտունու բաժնում՝ որպես հերթապահի օգնական, կոչումով՝ Ոստիկանության ավագ սերժանտ էր: