Ռոբերտ Քոչարյանը 924 հազար դրամ է փոխանցել Հեռուստամարաթոն 2017-ին

Նոյեմբերի 23-ին կայացավ «Բերքառատ Արցախը»-ը՝ «Հայաստան» համահայկական հիմնադրամի Հեռուստամարաթոն 2017-ը։ Հեռուստամարաթոնի ընթացքում հավաքվեց 12.505.456 մլն ԱՄՆ դոլարի նվիրատվություն, որն ուղղվելու է Արցախում խորքային հորերի հորատմանն ու նոր ոռոգման ցանցի կառուցմանը, ինչպես նաև Արցախում տեղակայվելու են նաև արևային էներգետիկ կայաններ։ Հեռուստամարաթոնի խոշոր նվիրատուների ցանկում ինչպես նախորդ, այնպես էլ այս տարի՝ հայտնվեցին Սամվել Կարապետյանը-2.250.000,  Սամվել Ալեքսանյանը- 200.000,  Վարդանյանների ընտանիքը-125.000,Վահե Կարապետյանը- 60.000 ԱՄՆ դոլար նվիրաբերությամբ, սակայն ՀՀ երկրորդ նախագահ Ռոբերտ Քոչարյանի անունը ցանկից բացակայում էր: lurer.com-ի հարցին ի պատասխան՝ Ռոբերտ Քոչարյանի գրասենյակի ղեկավար Վիկտոր Սողոմոնյանը նշել է, որ 2008 թվականից սկսած՝ ամեն տարի, ՀՀ երկրորդ նախագահն իր անձնական ներդրումն է ունենում հիմնադրամի կազմակերպած հեռուստամարաթոնին և արցախաշինությանը. «2008 թվականից ամեն տարի ՀՀ երկրորդ նախագահ Ռոբերտ Քոչարյանը հիմնադրամին է փոխանցում իրեն հատկացվող՝ նոյեմբեր ամսվա աշխատավարձը: Իսկ թե ինչու նրա անունը չի հայտնվում նվիրատուների ցանկում, երկրորդական է, կարևորն այստեղ պաշտոնաթող նախագահի մասնակցությունն է հիմնադրամի կազմակերպած հեռուստամարաթոններին»: Հիշեցնենք, որ պաշտոնաթող նախագահները պաշտոնաթողությունից հետո շարունակում են աշխատավարձ ստանալ: Եթե ընդունենք, որ ՀՀ նախագահի աշխատավարձը կազմում է 1 մլն 320 հազար դրամ, ապա ՀՀ երկրորդ նախագահի թոշակը, փաստորեն, կազմում է մոտավորապես 924 հազար դրամ, և, փաստորեն, հենց այսքան գումար է փոխանցում Ռոբերտ Քոչարյանը  «Հայաստան» համահայկական հիմնադրամի կազմակերպած հեռուստամարաթոններին։