«Վերջին հնարավորությունը»․ Պուտինը Զելենսկիին հետաքրքիր առաջարկ է արել

ԱՄՆ-ն սպառնում է դադարեցնել ռազմական մատակարարումները և դուրս գալ բանակցություններից, եթե Կիևը հրաժարվի Մոսկվայի հետ հաշտության համաձայնագրից։ Միևնույն ժամանակ, ԵՄ-ն չի կարող հասկանալ, թե ինչպես օգնել Զելենսկու ռեժիմին առանց արտասահմանյան աջակցության։ Ինչ է կատարվում ուկրաինական հակամարտության շուրջ․ նման հարցադրում է արել ՌԻԱ Նովոստին իր հոդվածում՝ հրադադարի ժամանակավոր առաջարկը համարելով վերջին հնարավորություն։

Ամպերը հավաքվում են

Ինչպես գրում է ՌԻԱ Նովստիի հոդվածագիրը՝ Դոնալդ Թրամփը խուսափել է պատասխանել Ուկրաինայի զինված ուժերին ամերիկյան զենքի հետագա մատակարարման հեռանկարների վերաբերյալ հարցին, քանի որ վախենում է իրավիճակը բարդացնելուց։

Ըստ հոդվածագրի՝ Թրամփը կարծում է, որ Պուտինը «ցանկանում է դադարեցնել պատերազմը»։ Եվ ընդհանուր առմամբ, Պուտինի հետ ավելի հեշտ է գործ ունենալ, քան Զելենսկու հետ։

Ինչպես հոդվածագիրն է շեշտում՝ պետքարտուղար Մարկո Ռուբիոն Մոսկվայից և Կիևից իրական առաջարկներ է ակնկալում՝ ռազմական գործողությունները դադարեցնելու համար։ Հակառակ դեպքում Վաշինգտոնը կհեռանա բանակցային գործընթացից։ Մյուս կողմից, ՄԱԿ-ում ԱՄՆ մշտական ​​ներկայացուցչի տեղակալ Ջոն Քելլին մատնանշել է Ռուսաստանի և Ուկրաինայի համար խաղաղության ձեռքբերումից հետո հսկայական օգուտները։ «Նրանց տնտեսությունները կսկսեն աճել, նրանց քաղաքները կվերականգնվեն, նրանց ազգերը կառողջանան»։

ԱՄՆ նախագահի հատուկ ներկայացուցիչ Քիթ Քելլոգի խոսքով էլ, Կիևի հետ արդեն համաձայնեցվել է 22 «շատ կոնկրետ» քայլերի ցանկ․ «Ուկրաինացիներին ամեն ինչ դուր չեկավ, բայց դա նորմալ է։ Եվ մենք բավականին լավ դիրքում ենք նրանց հետ։ Մենք բավականին հարմարավետ ենք այնտեղ, որտեղ հիմա ենք»։

Լույս վերջում

Ռուսաստանի նախագահը հայտարարել է հրադադարի մասին՝ ի պատիվ Հաղթանակի 80-ամյակի՝ մայիսի 8-ից 10-ը։
Արտաքին գործերի նախարար Սերգեյ Լավրովը Բրազիլիայում կայացած մամուլի ասուլիսում մանրամասնել էր․ «Մեր առաջարկը, որը հնչեցրեց Պուտինը, անմիջական բանակցությունների սկիզբն է՝ առանց նախապայմանների: Այս իրավիճակում զինադադարը (30-օրյա, որն առաջարկում են ԱՄՆ-ն և Ուկրաինան - խմբ.) համարվում է բանակցությունների նախապայման, որը կօգտագործվի Կիևի ռեժիմին հետագա աջակցելու և նրա ռազմական կարողությունները ամրապնդելու համար»: