Ուժի կիրառումն արդարացնող բացատրությունները ծայր աստիճան վտանգավոր են. քաղաքական վերլուծաբան

«Ես արդեն նշել եմ Պանդորայի արկղի շատ վտանգավոր ու բազմաշերտ «էֆեկտի» մասին, որ կարող է հերթական անգամ իջնել Հայաստանի գլխին»,-ահազանգում է քաղաքական վերլուծաբան Հակոբ Բադալյանը՝ անդրադառնալով Նոր Նորք վարչական շրջանի ղեկավարի աշխատակազմի շենքում «Հանրապետություն» կուսակցության անդամ Տիգրան Տեր-Մարգարյանի ու նրա թիմակիցների կողմից հասարակական ակտիվիստին ծեծելն արդարացնողներին։

Հիշեցնենք, որ «Հանրապետություն» կուսակցության, որի նախագահն Արամ Զավենի Սարգսյանն է, վերնախավն արդարացրել է իրենց թիմակցի բռնությունը։ Արամ Սարգսյանը հայտարարել է, որ Արթուր Չախոյանը սադրանք է կազմակերպել Հայաստանում Ռուսաստանի դեսպանատան պատվերով։

«Միջադեպի բացատրությունները մեկը մյուսից ոչ միայն անհեթեթ են, այլ իրենց տրամաբանությամբ՝ ծայրահեղ վտանգավոր: Չի կարող եւ ոչ մի բացատրությամբ լեգիտիմացվել Սահմանադրության եւ օրենքների շրջանակից դուրս ուժի որեւէ կիրառում: Երբ որեւէ, անգամ ամենավերամբարձ, եւ առավել եւս անհեթեթ պատճառաբանություններով ու բացատրություններով լեգիտիմացվում է Սահմանադրության եւ օրենքի շրջանակով չենթադրվող ուժի կիրառումը, դա բերում է հանրային տոտալ դեգրադացիայի եւ վայրիացման:

Որեւէ նշանակություն չունի, թե ինչպես կփաթեթավորվի այդ երեւույթը: Ընդ որում նկատեմ, որ ինչքան ճոխ ու պերճախոս լինի դրա փաթեթավորումը, այդքան շատ ավելի վտանգավոր է դառնալու փաթեթի ներսում եղածը»,-նշում է քաղաքական վերլուծաբանը։