Վիզաների ազատականացման համար դեռ հսկայական ջանք պիտի թափեք. Պյոտոր Սվիտալսկի

«Ես լավատես եմ եւ հավատում եմ, որ երկու կողմում էլ ունենք այն հանձնառությունը, որը կարող է տանել վիզայի ռեժիմի ազատականացման։ Վիզայի ռեժիմի  ազատականացումը իրավունք չէ, այն առավելություն է»,- լրագրողների հետ հանդիպման ժամանակ նշել է Հայաստանում ԵՄ պատվիրակության ղեկավար Պյոտր Սվիտալսկին՝ անդրադառնալով  Հայաստանի եւ ԵՄ-ի միջեւ վիզայի ռեժիմի ազատականացման հնարավորություններին։ Նրա փոխանցմամբ, այդ նպատակով իրավական, վարչական եւ ինստիտուցոնալ կարգավորումները պետք է իրականացվեն. «Իսկ դրանք դեռ պահանջում են  երկար աշխատանք եւ եվրոպական մտածելակերպ. Վիզաների ազատականացման համար դեռ հսկայական ջանք պիտի թափեք»: Սվիտալսկին նշել է, որ այս համաձայնագրի էական արդյունքները կերեւան իրականացումից հետո, իսկ Եվրամիությանը պատրաստ է նյութական, ֆինանսական լուրջ հիմքեր ստեղծել այն կյանքի կոչելու համար: Խոսելով ժամկետների մասին, նա նշեց, որ չի կարող հստակ ժամկետներ նշել, բայց կարծում է, որ մինչեւ 2020 թվականը վիզայի ռեժիմի ազատականացումը կլինի ակնկալվող 20 արդյունքներից մեկը։ «Հանգստանալու ժամանակը չէ, այլ ակտիվ աշխատելու եւ մեր ներդրումն իրականացնելու Հայաստանի զարգացման գործում, մեր գործունեությունը դարձնելու ավելի տեսանելի եւ արդյունավետ, եւ ճանաչելի հասարակ քաղաքացիների տեսանկյունից, որովհետեւ մենք ամեն ինչ անում ենք շարքային քաղաքացիների համար»,- ասել է Պյոտր Սվիտալսկին: