Պյոտր Սվիտալսկին Արցախի հակամարտության կարգավորման մասին
«Համաձայնագիրը շատ հստակ ասում է Արցախի մասին, և ԵՄ դիրքորոշումը շատ հստակ է։ ԵՄ-ն խաղաղ կարգավորման կողմնակիցն է, կողմնակից է ԵԱՀԿ ՄԽ համանախագահների աշխատանքին, պատրաստ է հստակ աջակցել վստահության կառուցմանը»,- այսօր լրագրողների հետ հանդիպման ընթացքում այս մասին ասաց Հայաստանում Եվրոպական միության պատվիրակության ղեկավար, Արտակարգ և լիազոր դեսպան Պյոտր Սվիտալսկին։ «Մենք հավատում ենք, որ հակամարտության կարգավորումը շատ կարևոր է Հայաստանի, ողջ տարածաշրջանի և եվրոպական հարևանության համար։ Համաձայնագրում օգտագործված լեզուն արտացոլում է ԵՄ-ՀՀ միջև առկա տոնը»,- ասաց նա։ Հարցին՝ 4 տարի առաջ ո՞վ հրաժարվեց Ասոցացման համաձայնագրից, Սվիտալսկին պատասխանեց. «Ի՞նչ նշանակություն ունի: Եկեք ապագային նայենք. չեմ կարծում, որ ժամանակն է անցյալին նայելու և կրկնելու այն զգացմունքները, որ կային 2013թ.-ին։ Հիմա մենք հստակ գիտենք, որ սա շատ կարևոր համաձայնագիր է և տարբերվում է ասոցիացման համաձայնագրից։ Սա խորը և ազատ առևտրի մասին համաձայնագիր չէ, բայց ԵՄ-ն առաջնորդվում է իր գործընկերների մղումներով: Այսօր սխալ է խոսել այն մասին, որ ԵՄ-ն ինչ-որ բան է պարտադրում: Ճիշտ կլիներ խոսել դրա մասին, եթե նոր համաձայնագիրը նման լիներ 4 տարի առաջվա համաձայնագրին»։ ԵՄ դեսպանի խոսքով` Հայաստանը թևակոխում է նոր ժամանակաշրջան, որտեղ բոլոր օրենսդրական, դատական բարեփոխումները գործնական կստուգվեն և կփորձարկվեն: «Մենք զգալու ենք Հայաստանում որակական փոփոխությունները այդ ոլորտներում: Եվրամիությունը մեծ աջակցություն է տեսնում ԵՄ-Հայաստան համաձայնագրի ստորագրման հարցում: Բոլոր շահագրգիռ անձինք, ՀՀ կառավարությունը, հասարակությունը կկարողանան նաև ականատես դառնալ կոռուպցիայի դեմ պայքարում նոր որակական փոփոխությունների»,- նշեց Սվիտալսկին: Եվրամիությունը և Եվրոպայի խորհուրդը աջակցում են Հայաստանին կոռուպցիայի դեմ պայքարում, և բավականին ծավալուն ծրագիր է իրականացվել Արդարադատության նախարարության, դատական համակարգի բարեփոխումների ուղղությամբ:
Հետևեք մեզ Viber-ում
