Մեր երկրի գրավչության ընկելու պատճառը մեկն է. դա ԵԱՏՄ-ի փակ լինելն է. Արամ Սարգսյան

ԱԺ-ում ԵԱՏՄ-ին ՀՀ-ի անդամակցությունը դադարեցնելու մասին խորհրդարանական լսումների ժամանակ «Ելք» խմբակցության պատգամավոր, նախկին վարչապետ Արամ Սարգսյանը, ներկայացնելով օտարերկրյա ուղիղ ներդրումների վիճակագրությունը` նախքան ԵԱՏՄ անդամ դառնալը, նշեց, որ որևէ երկրի հետ տնտեսական համագործակցության հիմքը տվյալ երկրի գրավչությունն է, իսկ գրավչությունը տվյալ երկրում արվող ներդրումներն են, որ ամենաէական ցուցանիշն է: Ինչպես տեղեկացրեց՝ 2013 թվականին, երբ Հայաստանը դեռ ԵԱՏՄ անդամ չէր, Հայաստանում ուղիղ ներդրումները կազմել են 598 միլիոն դոլար, 2014 թվականին՝ 347 միլիոն դոլար, 2015 թվականին՝ 245 միլիոն դոլար, իսկ 2016 թվականին՝ 168 միլիոն դոլար: «Ինչո՞ւ են նվազում ներդրումները Հայաստանում, այսինքն` ինչո՞ւ է ՀՀ-ն` ԵԱՏՄ մուտք գործելուց հետո, կորցրել իր գրավչությունը, որովհետև ներդրողների համար կարևոր ցուցիչ են արդար ընտրությունները, արդար դատական համակարգը, օրենսդրական դաշտը, որ իշխանությունների պնդմամբ՝ կատարելագործվում են, և այդ դեպքում մնում է մի գործոն` ԵԱՏՄ անդամությունը»,- ասաց նա: Նրա համոզմամբ՝ մեր երկրի գրավչության ընկելու պատճառը մեկն է. դա ԵԱՏՄ-ի փակ լինելն է: «ԵԱՏՄ-ի հիմնական գործող սուբյեկտ ՌԴ-ի վրա պատժամիջոցներ կիրառելն է, այդ պատժամիջոցները շարունակվելու են եւ այդ տնտեսական ազդեցությունը մենք մեր վրա զգալու ենք: Ես իսկապես մտածում եմ, որ մեկ երկու տարուց մենք այդ միությունից դուրս ենք գալու, այդ միությունը չի լինելու»,- ասաց Արամ Սարգսյանը: