Թուրքիայում ալեւիների տների վրա նշաններ են արել, ինչպես Մարաշի ջարդերից առաջ

Մալաթիայում բնակվող ալեւիները երթ են կազմակերպել` բողոքելով Մալաթիայի Ջեմալ Գյուրսել թաղամասում ալեւիների տների 13 դռների վրա արված նշանների դեմ եւ հայտարարել են. «Երբեք ծնկի չենք եկել, ծնկի չենք գալու»,- գրում է akunq.net-ը: Փիրսուլթան Աբդալ մշակութային միության (PSAKD) կազմակերպված երթին մասնակցել են նաեւ քաղաքական կուսակցությունների, այլ միավորումների ու քաղաքացիական հասարակության տարբեր ներկայացուցիչներ: PSAKD-ի Մալաթիայի մասնաճյուղի ղեկավար Մեհմեթ Թոփալն ասել է, որ Մարաշի ջարդերի ժամանակ էլ են զոհերի տների վրա նշաններ արվել: Հավելել է, որ այդ նշանները տեսնելն իրենց չի զարմացրել, քանի որ դա առաջ էլ են տեսել` Մարաշի ջարդերի ժամանակ. «Մենք` ալեւիներս, այս նշանը առաջին անգամ չէ, որ տեսնում ենք, ավելի վաղ Էրզինջանում, Անթեփում ու Ադըյամանում էլ ենք տեսել: Այս ամենից այլեւս չենք զարմանում: Դեռ մեր հիշողության մեջ վառ են Ադըյամանում դռներին արված նշանների առթիվ Ներքին գործերի նախարարի ասածները, թե «դռների վրա երեխաներն են նշան արել» ու այսպիսով դեպքն համարել աննշան երեւույթ: Այնուհետեւ տեսախցիկների տեսագրությունները ջնջվել էին, իսկ ֆայլերը` թաքցվել: Վաղն էլ Մալաթիայում այս նշաններն անողների վերաբերյալ կասեն. «Անհայտ երեխաների կամ մի չարաճճիի ձեռքի գործն է»: Գիտենք նաեւ, որ դեպքը չնչին մի բան կհամարեն եւ կթաքցնեն հետքերը»: Ջեմալ Գյուրսել թաղամասում 13 տների դռների վրա նշաններ անողները անցած անգամվա նման չեն բացահայտվի, չեն պատժվի, եւ սա առաջին եւ վերջին դեպքը չի լինի, ասել է Թոփալն ու ավելացրել. «Այս նշանները անելիս այդ երեխաները վստահելի տեղից են թույլտվություն ստացել: Իսկ այդ երեխաների` իշխանավորների ասած՝ «չարաճճի երեխաներ»-ի նկատմամբ իրավական ու պատժիչ նորմերը  չեն գործում: Ապրում ենք մի իրականության մեջ, որտեղ չեն հարգվում մարդու հիմնական իրավունքներն ու ազատությունները, որտեղ սեփական իրավունքները պաշտպանելը հանցանք է համարվում, օրենքները չեն գործում, փողոցներում ռումբեր են պայթում, հրապարակներում լինչի դատաստան են տեսնում, լրատվական դաշտում աճպարարությունն է իշխում. այս ամենը վախի մթնոլորտ է ստեղծել: Մի խոսքով` ԱԶԿ-ն Թուրքիան սեղմել է հեղաշրջման փորձի ու արտակարգ դրության միջեւ ու երկիրը կանգնեցրել փակուղու առջեւ»: Թոփալի խոսքով՝ այդ հարձակումը գործել են ալեւիների թշնամի, պահպանողական, ֆաշիստ անձինք. «Երբեք չպետք է մոռանալ, որ մեզ` ալեւիներիս, ինչքան էլ ճնշեն, ինչքան էլ հալածեն, միեւնույն է, մենք երբեք վիզ չենք ծռի, չենք հանձնվի: Երբեք ծնկի չենք գա: Եթե չգիտեն սա, թող պատմության գրքերը բացեն ու Քալենդեր Չելեբիի, Փիր Սուլթանի, Սեյիդ Ռըզայի մասին կարդան: Պատմության ընթացքում իրականացված հալածանքները, ջարդերը մեզ մեր ճանապարհից չեն շեղել, սրանից հետո էլ չի շեղելու»: