«Opel» տեսակի ավտոմեքենայի մաքսազերծումը կարժենա 2500 եվրո. Դանիել Իոաննիսյան
«Իրազեկ քաղաքացիների միավորում» հասարակական կազմակերպության ղեկավար Դանիել Իոաննիսյանը, այսօր ԱԺ-ում անցկացվող «ԵԱՏՄ-ից դուրս գալու» թեմայով խորհրդարանական լսումների ժամանակ անդրադառնալով ԵԱՏՄ-ի մաքսատուրքերին, նշեց, որ ԵԱՏՄ-ի մաքսային դրույքաչափերի 76 տոկոսն այլ են, քան Հայաստանի շահերից բխող այն դրույքաչափերը, որոնք սահմանել էր նախորդ գումարման ԱԺ-ն: Ըստ նրա՝ եթե Հայաստանը շարունակի իր անդամակցությունը ԵԱՏՄ-ին, ապա 2020 թվականից 7 տարուց ավելի հին ավտոմեքենաները մաքսազերծելիս քաղաքացիներն այդ մեքենայի շարժիչի աշխատանքային ծավալից յուրաքանչյուր խորանարդ/սանտիմետրի համար կվճարեն 1.6-ից 2.2 եվրո: «Նվազել են 1700 ապրանքատեսակի մաքսային դրույքաչափեր, 6300 ապրանքատեսակի դրույքաչափերն արդեն ավելացել են, դեռեւս 700-ն ավելանալու են առաջիկա տարիներին: Իսկ 1.6 լիտր աշխատանքային ծավալի շարժիչով «Opel» տեսակի ավտոմեքենայի մաքսազերծումը կարժենա 2500 եվրո, իսկ 2 լիտր շարժիչի ծավալով մեքենան՝ 4400 եվրո, ընդ որում՝ առանց ԱԱՀ-ի եւ բնօգտագործման հարկերի»,- ասաց նա՝ նշելով, որ եթե Հայաստանը մնա ԵԱՏՄ-ում, մեքենաները մաքսազերծելիս բնակիչները կվճարեն 3500-ից 6 հազար եվրո՝ ներառյալ ԱԱՀ-ն եւ բնօգտագործման հարկը:
Հետևեք մեզ Viber-ում
