Բոլոր հարթակները «Հանրապետական» կուսակցությանն են պատկանում
Քաղաքագետ, «Կովկաս» ինստիտուտի տնօրեն Ալեքսանդր Իսկանդարյանը լրագրողների հետ հանդիպման ընթացքում, խոսելով ներքաղաքական զարգացումներից, ասաց, թե այսօր ՀՀԿ-ականները կարողացել են վերցնել քաղաքական բոլոր հարթակները, թեև ընդդիմությունը նույնպես ներկայացված է խորհրդարանում: «2008 թվականից հետո շատ բան է փոխվել: Այն ժամանակ խորհրդարանում ընդդիմադիր որևէ ուժ ներկայացված չէր: Այսօր այդպես չէ: Ընդդիմադիրներն ընդգրկված են Ազգային ժողովում: Թեև չեն կարող լրջորեն ազդել որոշումներ ընդունելու վրա, բայց նրանց համար «տրիբունան» հասանելի է, կարող են իրենց խոսքը հասցնել հասարակությանը»,-ասաց Իսկանդարյանը: Խորհրդարանը, նախագահական նստավայրը, Երևանը, քաղաքական բոլոր հարթակներն, ըստ Իսկանդարյանի, «Հանրապետական» կուսակցությանն է, նույնիսկ սահմանադրական փոփոխությունները, որը թեև քաղաքական հարթակ չէ, բայց արդյունքն է նրա, որ ՀՀԿ-ականներն իրենց բավականին վստահ են զգում: «Նրանք բավականին վստահ են իրենց զգում ոչ թե այն պատճառով, որ ուժեղ են, այլ իրականում հակազդող որևէ ուժ չկա: Ընդդիմությունն այսօր ուժեղ մարգինալացված է, չի կարող հակազդել ՀՀԿ-ին»,-նկատեց բանախոսը:
Հետևեք մեզ Viber-ում
