Բռնություններից մինչև հարկային ճնշումներ. փաստաբանների խնդիրները՝ Հայաստանում
Փաստաբանները Հայաստանում բազմաթիվ խնդիրների են բախվում, Aysor.am-ի հարցին ի պատասխան ասաց Փաստաբանների պալատի նախագահ Սիմոն Բաբայանը՝ առանձնացնելով վարույթն իրականացնող մարմիններում փաստաբանների՝ բռնության ենթարկվելու դեպքերը։
«Բնականաբար, նմանատիպ գործելակերպն արդեն իսկ արգելված է կոնվենցիոն մակարդակում»,-ասաց Բաբայանը։
Նշենք, որ Երևանում անցկացվում է «Փաստաբանի մասնագիտության պաշտպանության մասին կոնվենցիա․ կարիքը և ակնկալիքները» թեմայով միջազգային համաժողովը։ Կոնվենցիայի ստորագրումը նախատեսվում է Եվրոպայում՝ մայիսին։ Հայաստանը՝ ի դեմս Փաստաբանների պալատի, դրական կարծիք է արտահայտել այդ կոնվենցիայի ընդունման կապակցությամբ։
«Բազում խնդիրներ են ունենում փաստաբանները, դրանք առ այսօր շարունակվում են. երբ, օրինակ, փաստաբանները չեն կարողանում հասանելիություն ունենալ իրենց պաշտպանյալներին և չեն կարողանում արդյունավետ գործունեություն իրականացնել։ Վերջին խնդիրներից մեկը, որի մասին բազմիցս ենք բարձրաձայնել, փաստաբանական գործունեության համար հարկման բարձր շեմի սահմանումն էր, ինչը հանգեցրեց անվճար իրավաբանական օգնության խաթարմանը։ Թեև օրենսդիր մարմինը վերջերս հրապարակեց արդեն իսկ ընդունված օրենք, որով փաստաբաններին թույլատրվում է մինչև 5 տոկոս անվճար գործեր վարել, բայց այդ չափի սահմանումը ևս համարում ենք խնդրահարույց»,-ասաց Սիմոն Բաբայանը։
Փաստաբան Վարազդատ Հարությունյանն էլ Aysor.am-ի հետ զրույցում ասաց, որ փաստաբանների իրավունքների պաշտպանության տեսանկյունից փաստաբանության մասին հայաստանյան օրենսդրությունը բավական բարենպաստ է։
«Քննարկվող և առաջիկայում Եվրոպայում ստորագրվելիք կոնվենցիայի բազմաթիվ դրույթներ արդեն վաղուց ներմուծված են Հայաստանի օրենսդրության մեջ, բայց գործնականում փաստաբանները բախվում են բազմաթիվ խնդիրների։ Մասնավորապես, քննչական մարմիններում ներգրավման խնդիրներ են լինում, քննիչները հապաղում են փաստաբանների ներգրավման հարցերը լուծել, դրանով նաև խոչընդոտում են պաշտպանյալների իրավունքների պաշտպանությանը»։
Հիմնական խնդիրը, Վարազդատ Հարությունյանի գնահատմամբ, հարկային օրենսդրության վատթարացումն է։
«Իշխանություններն ընտրանքային վերցրին ու փաստաբանությունը որպես առաջին մասնագիտական միավորում տեղափոխեցին շահութահարկով հարկման դաշտ, ինչը փաստաբանության նկատմամբ ընդգծված բացասական վերաբերմունքի դրսևորում էր։ Սա ազդում է անձանց իրավաբանական օգնության իրավունքի մատչելիության վրա»,-ասաց Վարազդատ Հարությունյանը։
Հետևեք մեզ Viber-ում
