Հրաշքով ողջ մնացած Պապը այժմ աղոթում է, որ սպիտակ ծուխ դուրս գա հայ-ադրբեջանական պայմանագրից, այն դեպքում, երբ ընդամենը օրեր առաջ Վատիկանում թույլ էր տվել ադրբեջանական սևի խրախճանքը. Հակոբ Բադալյան
Քաղաքական վերլուծաբան Հակոբ Բադալյանը տելեգրամի իր ալիքում գրել է․
«Հռոմի Պապը Սուրբ Պետրոսի հրապարակի պատշգամբից կարճատև ուղերձի ժամանակ հիշել է աշխարհի թեժ կետերն ու նաև հայ-ադրբեջանական հարցը, ասելով, որ աղոթում է հայ-ադրբեջանական խաղաղության պայմանագրի շուտ ստորագրման համար:
«Աղոթե՞լ ես գիշերը, Դեզդեմոն… էհ, Ֆրանցիսկոս»: Պապն ըստ երևույթին աղոթում է, որ հետո չտան ավելորդ հարցեր:
Պուտինն Ուիտկոֆֆին ասել էր, թե նախընտրական արշավի ժամանակ Թրամփի դեմ մահափորձից հետո գնացել է եկեղեցի և աղոթել նրա կյանքի ու առողջության համար:
Աղոթքը դարձել է միջազգային հարաբերությունների կատեգորիա՞: Հետաքրքիր է:
Կլսի՞ Պապի աղոթքը Բարձրյալը: Կլսի, անկասկած: Հարցն այն է սակայն, որ հայ-ադրբեջանական խաղաղության հարցն Աստծո ձեռքերում չէ: Իսկ, եթե մնացել է Աստծո ձեռքերում, ապա դա գուցե արդեն խաղաղության հարց չէ, այլ նախախնամության:
Ֆրանցիսկոս Առաջինը հայ-ադրբեջանական պայմանագրի ստորագրման համար աղոթքո՞վ էր զբաղված օրեր առաջ, որ չէր «նկատել» Վատիկանում ադրբեջանական «գիտաժողովը», որտեղ նենգափոխվում էր Արցախում հայկական քրիստոնեական ժառանգության պատմությունը:
Կիլիկիո կաթողիկոս Արամ առաջինն այդ կապակցությամբ իր հայտարարությունում նշել էր, թե ՎՍՏԱՀ է, որ պաշտոնական Վատիկանը չէ այդ մոտեցումների կրողը կամ համակիրը:
Որտեղի՞ց այդ վստահությունը: Պա՞պն է ասել, թե՞ որևէ մեկը՝ Պապի անունից:
Թե Վատիկանի պաշտոնական տեսակետն այժմ այլ տեղ է, առայժմ՝ ոչ պապական գահին:
Ֆրանցիսկոս Առաջինը մահամերձ էր շաբաթներ առաջ, բայց փրկվեց հրաշքով: Ըստ երևույթին Սիքստինյան մատուռի «ծխնելույզը» դեռ լավ մաքրված չէր՝ սպիտակ ծուխ դուրս գալու համար:
Հրաշքով ողջ մնացած Պապը այժմ աղոթում է, որ սպիտակ ծուխ դուրս գա հայ-ադրբեջանական պայմանագրից, այն դեպքում, երբ ընդամենը օրեր առաջ Վատիկանում թույլ էր տվել ադրբեջանական սևի խրախճանքը: Դա խաղաղության գի՞նն էր, թե՞ չվճարելու հետևանքի ակնարկը»:
Հետևեք մեզ Viber-ում
