Բացի հանրային ճնշումից, մենք որևէ կերպ չենք կարող ազդել ՀՀ կառավարության որոշումների վրա․ Շահրամանյան

Այսօր կեսօրին լարված իրավիճակ է ստեղծվել Երեւանում Արցախի ներկայացուցչության մոտ։ Մինչ տասնյակ հազարավոր արցախցիներ բողոքի ակցիաներ են անում ու պահանջում իշխանություններից հետամուտ լինել արցախցիների՝ Արցախ վերադարձի իրավունքի իրացմանն ու գերիների ազատ արձակմանը, մի փոքրաթիվ խումբ՝ Արթուր Օսիպյանի գլխավորությամբ ակցիաներ է անում Արցախի ներկայացուցչության մոտ՝ պահանջելով Արցախը թալանածների բացահայտում։

Արցախի նախագահ Սամվել Շահրամանյանը դուրս է եկել Արցախի ներկայացուցչության առջև հավաքված ցուցարարների մոտ և անդրադարձել «Արցախում 48 ընտանիքի կողմից թալանված 467 մլն դոլարի» թեմային։

Արցախի նախագահ Սամվել Շահրամանյանը անձամբ է դիմել ՀՀ գլխավոր դատախազությանը՝ խնդրելով քննության առարկա դարձնել թալանի վերաբերյալ բոլոր հրապարակումները:

«Ես հրավիրվել եմ հարցաքննության, եղել եմ վկայի կարգավիճակով։ Այդ ժամանակ առգրավվել են Ներդրումային հիմնադրամի էլեկտրոնային կրիչները։ Մինչև 1000 դրամ իրենք գիտեն, թե ինչ է կատարվել Արցախում այդ հիմնադրամում։ Վերջերս հորդորել ենք իրավապահ մարմիններին` ակտիվացնել այդ ուղղությամբ տարվող գործողությունները: Բացի հանրային ճնշումից, որևէ կերպ չենք կարող ազդել ՀՀ կառավարության որոշումների վրա։

Մեր բոլոր հնարավորությունները մենք օգտագործել ենք հասցնելու, որ ժողովուրդը գտնվում է ծայրահեղ ծանր վիճակում և դադարեցնելով այս 50 հազարները նաև հայտնվելու ենք փողոցներում: Ես էլ եմ կիսում ձեր մտահոգությունը՝ մենք, այո, ունենք սոցիալական հարցերը լուծելու այդ խնդիրը, բայց դրա հնարավորությունը չունենք»,- ասել է Շահրամանյանը։