ԱՄՆ-ն պետք է հրաժարվի Թեհրանի դեմ ուժ կիրառելու հնարավորությունից. Արաղչի

Վաշինգտոնը պետք է հրաժարվի Թեհրանի դեմ ուժ կիրառելու հնարավորությունից: Այս մասին հայտարարել է Իրանի արտաքին գործերի նախարար Աբբաս Արաղչին The Washington Post-ի կայքում հրապարակված հոդվածում։

Մեկնաբանելով Թեհրանի և Վաշինգտոնի միջև ապրիլի 12-ին Օմանում կայանալիք անուղղակի բանակցությունները՝ նա նշել է, որ իրանական կողմը «պատրաստ է լուրջ փոխգործակցության՝ գործարք կնքելու նպատակով»։

Միևնույն ժամանակ, Արաղչին ընդգծել է, որ ԱՄՆ-ի և Իրանի միջև փոխգործակցության անուղղակի ձևաչափը բացատրվում է «զգալի անվստահությամբ» և մտադրությունների անկեղծության վերաբերյալ կասկածներով, որոնք միայն ուժեղացել են՝ կապված Իրանի վրա առավելագույն ճնշման ԱՄՆ քաղաքականության վերսկսման հետ։

«Այսօր առաջ գնալու համար նախ պետք է համաձայնել, որ չի կարող լինել «ռազմական տարբերակ» և, իհարկե, «ռազմական լուծում»: Թրամփը հստակ գիտակցում է այս իրողությունը՝ կոչ անելով դադարեցնել հրադադարը՝ որպես ուկրաինական հակամարտության դադարեցման առաջին քայլ»,- ընդգծել է Իրանի արտգործնախարարը։

Արաղչին շեշտել է, որ Թեհրանը պատրաստ է «պարզաբանել իր մտադրությունների խաղաղ բնույթը և անհրաժեշտ միջոցներ ձեռնարկել իր միջուկային ծրագրի շուրջ հնարավոր մտահոգությունները վերացնելու համար»։

«Իր հերթին, ԱՄՆ-ն կարող է լուրջ մոտեցում ցուցաբերել դիվանագիտության նկատմամբ՝ հավատարմություն ցուցաբերելով իր կնքած ցանկացած գործարքի նկատմամբ: Եթե մեզ հարգանքով վերաբերվեն, մենք կպատասխանենք»,- ասել է ԻԻՀ արտաքին գործերի նախարարության ղեկավարը՝ ընդգծելով, որ «ռազմական (ներուժի) կուտակումը հակառակ ուղերձն է ուղարկում»:

«Իրանը նախընտրում է դիվանագիտությունը, բայց գիտի, թե ինչպես պաշտպանվել»,- նշել է Արաղչին՝ հավելելով, որ «գնդակը ամերիկյան դաշտում է»։