Շավարշ Քոչարյանը՝ Սերգեյ Լավրովի հայտարարությունների մասին
Այսօր կառավարության նիստից հետո լրագրողների հետ զրույցում ՀՀ փոխարտգործնախարար Շավարշ Քոչարյանը, մեկնաբանելով ՌԴ ԱԳ նախարար Սերգեյ Լավրովի հայտարարությունը, որ Ղարաբաղյան խնդիրը բարդ խնդիր է, և բանակցությունները շուտ չեն ավարտվի, նշեց, որ հասկանում են, որ շատ բարդ խնդիր է։ «Այդ պայմաններում, բնական է, նա ամեն ինչ անելու է, որ ստատուս-քվոն պահպանվի։ Որպեսզի բանակցությունները կարողանան առաջ շարժվել, կողմերի միջև պետք է լինի վստահություն։ Վստահությունը ենթադրում է նաև այն միջոցառումների իրականացումը, որոնց մասին խոսվել է և՛ Վիեննայում, և՛ Սանկտ Պետերբուրգում։ Ինչ վերաբերում է հետաքննության մեխանիզմներին, ապա դա Ադրբեջանի միջազգային պարտավորությունն է դեռևս 95 թ. եռակողմ պայմանագրով՝ Ադրբեջան-Ղարաբաղ-Հայաստան, ինչպես նաև այդ հարցը բարձրացվել է նախկինում, վերջին անգամ դրա մասին խոսվել է Վիեննայում»,- ասաց նա: Անդրադառնալով ՌԴ ԱԳՆ Սերգեյ Լավրովի արտահայտած այն մտքին, թե հնարավոր է Ադրբեջանը եւս միանա ԵՏՄ-ին, նշեց. «Դա ենթադրում է՝ եթե Ադրբեջանը ցանկանում է այս կամ այն ձեւով մոտենալ ԵՏՄ-ին, ապա այլեւս ագրեսիվ քայլեր չի ձեռնարկի: Իսկ եթե խոսենք տնտեսական դաշտից, բավական է նշել մի բան, որ նա շրջափակում է ՀՀ-ն: Ակնհայտ է, որ դրանք գործողություններ են, որոնք ուղղված են ի վնաս անդամ պետությունների շահերի: Դրա համար ԵՏՄ միանալը կամ դիտորդ դառնալը ներկայումս էլ ողջունելի կլինի, եթե Ադրբեջանը կստանձնի այն պարտավորությունները, որոնք սահմանված են թե դիտորդ, թե անդամ պետությունների համար: Իսկ դա նշանակում է շրջափակումը վերացնել, թշնամական գործողություններ չիրականացնել, դա նաեւ նշանակում է վերջ տալ հայատյացությանը»:
Հետևեք մեզ Viber-ում
