Ցնցող թվեր Սիրիայի պատերազմի մասին. «Ազդակ»-ի անդրադարձը

Սիրիայի հնգամյա պատերազմի պատճառով երկրի տնտեսության վնասը գնահատվում է 103.000.000.000 (103 միլիարդ) դոլար, Կենտրոնական բանկի արտարժույթի վնասը՝ 25.000.000.000 (25 միլիարդ) դոլար, քանդվել է 3 մլն բնակարան, 224 հիվանդանոց, 3000 դպրոց, 1000 դպրոց վերածվել է ապաստարանի, ավերվել է 1485 մզկիթ ու եկեղեցի։   Մարդկային զոհերի ստույգ թիվը չկա կամ դեռ հստակ չի հրապարակվել, թեև ասում են՝ շուրջ 400 հազար է։   Այս թվերը Լիբանանի «Ազդակ» պարբերականի էջերում ներկայացնում է հալեպահայ Հակոբ Միքայելյանը՝ դիմելով «աշխարհի ղեկավարներին»։   Հեղինակի հոդվածը ներկայացնում ենք առանց կրճատումների. «Նեխած հոգիների ու բթացած ուղեղների տերերը, որոնք ղեկավարում են աշխարհը, թող իրենց գերծանրաբեռնված վիճակում իրենց վիսկիի, օղու և արաբական սուրճի բաժակները մի վայրկյան վայր դնեն և աչքերը սևեռեն այս չավարտված հնգամյա տեղեկագիր-հաշվետվության վրա։ Ներողություն եմ խնդրում, եթե իրենց ըմպելիքի մեջ լեղի կաթեցրի։   Եթե այս խոսուն թվերը կարողացան ինչ-որ բան շարժել նրանց մեջ, թեև շատ հույս չունեմ, կգոհանամ, որ դեռ չմեռած զգացումներ կան։   Աշխա՛րհ, մարդի՛կ, քսանմեկերորդ դարն է, արհեստագիտական հսկայաքայլ առաջադիմության դարը. այս ի՞նչ եք անում, դեպի ո՞ւր եք տանում մարդկությանը։   Ինչո՞ւ եք քանդում պատմական-հնագիտական հսկա հարստություն ունեցող մի երկիր, ինչո՞ւ եք ավերում խաղաղ բնակիչների տները, Աստծո անունով ինչո՞ւ եք ավերում Աստծո տները։ Ափսոս չէ՞ Սիրիայի նման խաղաղ, բարգավաճ, ծաղկուն երկիրը դժոխքի վերածելը։   Ի հեճուկս հնգամյա ահագնագույն պատերազմի՝ Սիրիան դեռ ոտքի է, ծնկի չի եկել ու ծախսված բոլոր միլիարդների, տականքների ոհմակների գեհենային հարձակումների, մարդասպանության տարատեսակ եղանակների կիրառումից հետո, Արևմուտքը նոր է միայն անդրադառնում իր սխալին ու խոստովանում, որ Սիրիային ընկճելն անկարելի է։   Ինչպես բոլոր պատերազմները, այս պատերազմն էլ վերջ կունենա անպայման։ Հայտնի չէ, թե երբ, հնարավոր չէ կանխագուշակել, թե ինչպես, սակայն արդյունքն արդեն հայտնի է. կարդացիք վերը նշված թվերը, որոնք կարող են ավելանալ այնքան ժամանակ, քանի դեռ պատերազմն ավարտված չէ, իսկ դրանից հետո՞...   Պատերազմի ավարտից հետո ի՞նչ է տեղի ունենալու. հաշվեհարդարն անխուսափելի է։ Ո՞վ պիտի հատուցի Սիրիայի վնասները։ Թերևս քանդվածները վերակառուցվեն, տնտեսությունը սկսի նոր ծաղկում ապրել, իսկ մարդկային կորուստը...»։