Սերժ Սարգսյան-Կարեն Կարապետյան-ՀՅԴ․ով ում է սիրահետում
Այն, որ Դաշնակցություն կուսակցությունում վերջին տարիներին ճգնաժամ և ճահճացում կա, չեն հերքում նույնիսկ հավատավոր ընկերները: Հատկապես Սփյուռքի ՀՅԴ-ականները պատեհ առիթներով հաճախ են պոռթկում, որ հայաստանյան ընկերները հեռացել են կուսակցության հռչակած սկզբունքներից : Սրան զուգահեռ հայաստանյան լիդերները դեռ կաշվից դուրս են գալիս` ցույց տալու, թե ամեն բան առավել քան լավ է: Սակայն ներկայումս Դաշնակցության պահվածքին հետեւելիս ակնհայտ է դառնում, որ թիմը քայլում է տարբեր ուղղություններով, միահամուռ ու կուռ չէ, ինչպես հորջորջում են հին ընկերներ, նրանցից յուրաքանչյուրն իր տեղն է հարթում իշխանության «արեւի» տակ։ Գաղտնիք չէ, որ Կարեն Կարապետյանի վարչապետ դառնալու առաջին իսկ օրերից նրա եւ ՀՅԴ-ական նախարարների ջրերը մեկ առվով չհոսեցին, այդ տարաձայնությունները հայտնվեցին նաեւ մամուլի էջերում, հիմա իրավիճակն այն աստիճան է սրվել, որ Արծվիկ Մինասյանն ու Կարեն Կարապետյանը միմյանց տեսնելիս նույնիսկ չեն բարեւում։ Կարեն Կարապետյանը իսկզբանե դեմ էր ՀՅԴ-ի հետ կոալիցիային ՝ համարելով նրանց «ավել ուտող» բերան կերակրատաշտակի մոտ։ Դաշնակցական նախարարներից թերեւս միայն Դավիթ Լոքյանն էր, որ այս ընթացքում իշխանության վերնախավի հետ սերտ կապի շնորհիվ կարողացավ հարաբերություններ կառուցել նաեւ Կարեն Կարապետյանի հետ, իսկ մյուսների սառը շփումները վարչապետի հետ անգամ տեսանելի են։ Կառավարության նկատմամբ ոչ ջերմ վերաբերմունք է դրսեւորում նաեւ մեկ այլ դաշնակցական Հրանտ Մարգարյանը։ Վերջինս տարեցտարի առավել խորացնում է Սերժ Սարգսյանի հետ անձնական մտերմությունը եւ բիզնես գործընկերությունը եւ հարկ եղած դեպքում խայծում իշխանական որոշ գործընկերների, որոնք Սարգսյանի հակառակորդն են, խոսքը, բնականաբար, Կարեն Կարապետյանի մասին է։ Մինչդեռ կուսակցության կարկառուն ներկայացուցիչներից Աղվան Վարդանյանի մոտ նկատելի է Կարեն Կարապետյանի նկատմամբ առանձնահատուկ վերաբերմունքը։ Վերջին ժամանակներում ի հեճուկս այն բանի, որ կուսակիցները Կարապետյանի նկատմամբ հրապարակային չեզոք վերաբերմունք են դրսեւորում, Աղվան Վարդանյանը գովաբանում է վարչապետին եւ նրա գործունեությունը։ Այդ վերաբերմունքը դրսեւորվեց նաեւ ԱԺ ճեպազրույցների ընթացքում։ ՀՅԴ խմբակցության քարտուղարն ասաց, որ իրենց լիովին գոհացնում է կառավարության գործունեությունը. «Ճանապարը ճիշտ է ընտրված, մնացածը տեսողության խնդիրներ են»: Աղվան Վարդանյանն այդպես պնդեց, երբ նրան հարցրեցին, թե ինչ խղճով է ՀՅԴ-ն պատրաստվում կողմ քվեարկել 2018 թվականի բյուջեի նախագծին, երբ ընդդիմադիր խմբակցությունները բարձրաձայնում են երկրում օրեցօր ավելացող խնդիրների մասին: «ՀՅԴ-ի խիղճը կտրուկ տարբերվում է մյուսների խղճից, առաջին արդյունքները կան: Մյուսներին կարող եք հարցնել, թե ինչպես էին կողմ քվեարկում նախորդ որոշ կառավարությունների բյուջեին»,-ասաց նա՝ քար նետելով Ծառուկյան դաշինքի ուղղությամբ, որն անցած քառօրյային գրոհ ձեռնարկեց Կարեն Կարապետյանի ու ՊԵԿ-ի դեմ։ Սակայն Ծառուկյան դաշինքի նկատմամբ կսմիթներն այսքանով չեն սահմանափակվում, պարոն Վարդանյանն ասում է, որ ընդդիմությունը լինում է մոլի բառի ամենատարբեր իմաստներով, ակնարկելով, որ Ծառուկյան դաշինքի վերաբերմունքը Կարեն Կարապետյանի նկատմամբ պայմանավորված է սեփական բիզնեսի՝ Առինջ մոլի առեւտրականների խնդրով։ Սակայն Դաշնակցությունում ստեղծված իրավիճակը գրեթե չի տարբերվում Ծառուկյան դաշինքում ստեղծվածից, այստեղ նույնպես անհատները առաջնորդվում են ոչ թե կուսակցական գաղափարախոսության, միասնականության ուղով, այլ անձնական շահից ելնելով։ Չի բացառվում նաեւ, որ ՀՅԴ-ն ցավով է ընդունում ՀՀԿ-Ծառուկյան դաշինք կոալիցիայի հեռանկարից, որի մասին մամուլը գրում է արդեն մի քանի ամիս շարունակ։ Անի Սահակյան
Հետևեք մեզ Viber-ում
