«Այս քողածածկույթի տակ Փաշինյանը թաքցնում է Ալիևի հերթական պահանջի կատարումը». Սուրեն Սուրենյանց
Մարտի 13-ին Նիկոլ Փաշինյանը «Իրական Հայաստանի» գաղափարախոսության նախագծի քննարկման ժամանակ հայտարարեց, որ ՀՀ Սահմանադրություն փոխելը Բաքվի պահանջով չի կատարվում, և Հայաստանի նոր Սահմանադրության տեքստը պետք է ունենա տարածաշրջանային նշանակություն։ Թե ի՞նչ է նշանակում այս ամենը՝ Նիկոլ Փաշինյանը չմանրամասնեց։
Այսօր ԱԺ-ում լրագրողների հետ ճեպազրույցում Արդարադատության նախարար Սրբուհի Գալյանը մանրամասնեց, թե ի՞նչ է նշանակում տարածաշրջանային նշանակության Սահմանադրություն։
Սրբուհի Գալյանի խոսքով՝ «խաղաղությունը, խաղաղության պայմանագիրը և խաղաղությանը միտված հարաբերությունները չվտանգող Սահմանադրության մասին է խոսքը»։
«Դեմոկրատական այլընտրանք» կուսակցության նախագահ, քաղաքագետ Սուրեն Սուրենյանցը Նիկոլ Փաշինյանի հայտարարությունը համարում է աբսուրդ, քանի որ որևէ կերպ անմեկնաբանելի է, թե ինչ ասել է՝ «տարածաշրջանային նշանակության Սահմանադրություն» ։«Նրա օգտագործած այդ տերմինն անհեթեթություն է, քաղաքագիտության մեջ նման բան առաջին անգամ եմ լսում։
Իրականում այս ամենը քողածածկույթ է, որի տակ Փաշինյանը թաքցնում է Ալիևի հերթական պահանջի կատարումը։ Թեպետ այս ամենն այնքան ակնհայտ է, որ այլևս չի կարողանում թաքցնել»,- 168.am-ի հետ զրույցում նշեց Սուրեն Սուրենյանցը։
Քաղաքագետը շեշտեց՝ առհասարակ, երբ Սահմանադրություն են փոխում, պետք է հստակ ներքին մոտիվներ ունենան, օրինակ՝ կառավարման համակարգն են վերանայում, մարդու իրավունքների պաշտպանության ինստիտուտներն են ուժեղացնում, և այլն։ Սակայն կոնկրետ Հայաստանի դեպքում գործում է միայն արտաքին պարտադրանքը, այլ բացատրություն չի կարող լինել։
«Եթե մենք հանում ենք «տարածաշրջանային նշանակություն» անհեթեթ տերմինը, տեսնում ենք, որ Սահմանադրությունը փոխելու այլ մոտիվ ուղղակի գոյություն չունի՝ բացի Ադրբեջանի ու Թուրքիայի պահանջից»,- հավելեց Սուրեն Սուրենյանցը։
Ինչ վերաբերում է Արդարադատության նախարարի բացատրությանը, թե «տարածաշրջանային նշանակություն» ունեցող բառակապակցությունը նշանակում է «խաղաղությունը, խաղաղության պայմանագիրը և խաղաղությանը միտված հարաբերությունները չվտանգող Սահմանադրություն», Սուրեն Սուրենյանցը նկատեց՝ ՀՀ ներկայիս Սահմանադրությունը բացարձակապես տարածաշրջանի խաղաղությունը չի վտանգում։
«1995 թվականից սկսած՝ մեր Սահմանադրությունը որևէ ձևով չի վտանգել խաղաղությունը։ Հենց Նիկոլ Փաշինյանի Սահմանադրական դատարանը որոշեց և նախորդ տարի եզրակացություն տվեց, որ մեր Սահմանադրության տեքստում չկան կետեր, որոնք տարածքային պահանջներ են ներկայացնում որևէ պետության»,- ընդգծեց Սուրեն Սուրենյանը։
Հետևեք մեզ Viber-ում
