Թբիլիսիում շարունակվում է հակաահաբեկչական գործողությունը. վիրավորվել է մեկ հատուկջոկատային
Վրաստանի մայրաքաղաք Թբիլիսիում տեղի է ունենում հակաահաբեկչական հատուկ գործողություն: Քաղաքում հնչում են կրակոցներ եւ պայթյուններ, վիրավորվել է մեկ հատուկ ջոկատային: Ինչպես գրում է interpressnews.ge-ն, այս մասին հայտնում են երկրի Պետական անվտանգության ծառայությունից: Նշվում է, որ վիրավորին տեղափոխում են հիվանդանոց: Հատուկ գործողությունը շարունակվում է մոտ 13 ժամ: Ենթադրաբար իրավապահները փորձում են ձերբակալել բնակարաններից մեկում արգելափակված երկու անձանց: Հայտնի է, որ վերջիններս կրակ են բացել իրավապահների ուղղությամբ: Իրավապահներն արգելափակել են հարակից տարածքը, մոտակայքում գտնվող դպրոցում չեղարկվել են դասերը: Կրակոցների և պայթյունների հետևանքով հատուկ գործողության անցկացման վայրում հրդեհ է բռնկվել: Այն տարածվել է բնակելի շենքի 3-րդ և 4-րդ հարկերում: Դեպքի վայրում մոբիլիզացվել են հրշեջ-փրկարարական ջոկատները: Դեպքի վայր են ժամանել նաև շտապօգնության լրացուցիչ ջոկատներ: Ոչ պաշտոնական տեղեկություններով՝ հատուկ գործողությունն իրականացվում է «Իսլամական պետություն» ահաբեկչական խմբավորման հետ կապված անձանց դեմ: Տեղի բնակիչները պատմել են, որ շենքում ապրում են օտարերկրացիներ, որոնք մի քանի բնակարան են վարձում: Մեկ այլ վարկածի համաձայն՝ անձինք, որոնց փորձում են ձերբակալել իրավապահները, Պանկիսի կիրճից են: Նշենք, սակայն, որ պաշտոնապես այս տեղեկությունները չեն հաստատվել:
Հետևեք մեզ Viber-ում
