Շատ համեստ էր, խելացի. Արցախում ականի պայթյունից զոհված Գեղամ Զաքարյանը սպա էր.ՀԺ

Երեկ Արցախում ականապայթյունի հետեւանքով զոհված 22-ամյա Գեղամ Զաքարյանը սպա էր, կոչումով՝ լեյտենանտ: Նա Արմավիր մարզի Մուսալեռ համայնքի բնակիչ էր: Հայակական ժամանակի հետ զրույցում համայնքի ղեկավար Էդգար Հովհաննիսյանն ասաց, որ Զաքարյանը մի քանի ամիս առաջ էր ավարտել ՀՀ ՊՆ Վազգեն Սարգսյանի անվան ռազմական համալսարանն ու ծառայության անցել Արցախի զորամասերից մեկում: «Խելացի ընտանիք, հայրը, մայրը աշխատող, ուներ մեկ քույր, մեկ եղբայր, ամուսնացած են, նա ընտանիքի փոքրն էր, ապրում էր ծնողների հետ: Սոցիալական պայմաններն էլ միջին են, ոչ ծանր, ոչ լավ: Շատ համեստ, խելացի անձնավորություն էր: Շատ հպարտ եմ իրենով»,- այսպես բնութագրեց Հովհաննիսյանը: Ականապայթյունի հետեւանքով զոհված մյուս զինծառայողը՝ Սարգիս Գուրգենի Աբրահամյանը Մասիս քաղաքի բնակիչ էր, իսկ Սարգիս Մհերի Մելիքյանը՝ Վարդենիս: Նշենք, որ ականապայթյունի հետեւանքով եւս մեկ զինծառայող՝ Նարեկ Հայկի Հովեյանը ստացել է ականապայթյունային ծանր վիրավորում: Ավելի վաղ Արցախի ՊԲ-ն հաղորդագրություն էր տարածել՝ նշելով, որ նոյեմբերի 21-ին՝ ժամը 18:35-ի սահմաններում, ՊԲ հյուսիսարևելյան ուղղությամբ տեղակայված զորամասերից մեկի պահպանության տեղամասում ականապայթյունային մահացու վիրավորումներ են ստացել ՊԲ զինծառայողներ Գեղամ Կորյունի Զաքարյանը (ծնվ. 1995թ.), Սարգիս Գուրգենի Աբրահամյանը (ծնվ. 1998թ.) և Սարգիս Մհերի Մելիքյանը (ծնվ. 1997թ.): Զինծառայող, 1998թ. ծնված Նարեկ Հայկի Հովեյանը ստացել է ականապայթյունային վիրավորում: Նրա վիճակը գնահատվում է ծանր: