Լարված իրավիճակ ծռերի գործով նիստին
Երեւանի Շենգավիթ վարչական շրջանի ընդհանուր իրավասության դատարանում այսօր՝ նոյեմբերի 21-ին, «Սասնա ծռեր» զինված խմբի գործով առանձնացված 2-րդ մասով նիստին դատարանը մերժեց գործով մեղադրյալ Արամ Արամյանին հայտնված բացարկի միջնորդությունը:Այս գործով հիշեցնենք, կա 11 ամբաստանյալ՝ Արամ Մանուկյան, Հովհաննես Հարությունյան, Թաթուլ Թամրազյան, Արամ Հակոբյան, Տիգրան Մանուկյան, Արայիկ Հակոբյան, Վարդան Գերավետյան, Մարտիրոս Հակոբյան, Սերգեյ Կյուրեղյան, Գեւորգ Իրիցյան, Թորոս Թորոսյան: Երբ Մուշեղ Շուշանյանը միջնորդություն ներկայացրեց իր պաշտպանյալ Սերգեյ Կյուրեղյանի կալանքը փոխելու վերաբերյալ, առարկությամբ հանդես եկավ մեղադրող դատախազներից Արամ Արամյանը, առարկության մեջ նշելով ամբաստանյալ բառը, ինչն էլ պատճառ դարձավ լեզվակռվի համար: «Սասնա ծռեր» խմբի անդամ Արամ Մանուկյանը՝ դիմելով դատախազին ասաց. «Ամբաստանյալ մի՛ ասա», ինչին ի պատասխան մեղադրող դատախազ Արամ Արամյանն ասաց. «Արա, դու ձենդ կտրի՛»: Լարված իրավիճակ ստեղծվեց, ամբաստանյալները զայրացան: Սակայն, դատավոր Արթուր Օհանյանը մեղադրող դատախազի նկատմամբ սանկցիա չկիրառեց, ինչն ավելի զայրացրեց պաշտպանական կողմին:
Հետևեք մեզ Viber-ում
