Բաքուն արգելված միջոց է կիրառում գերիների հանդեպ․ Փաշինյանի արձագանքը (video)

Մենք հստակ գնահատական ենք տվել, որ Բաքվում տեղի ունեցող դատավարությունների համատեքստում ունենք ինֆորմացիա, որ օգտագործվում են արգելված միջոցներ և խոշտանգումներ, ԱԺ-կառավարություն հարցուպատասխանի ժամանակ հայտարարեց վարչապետ Նիկոլ Փաշինյանը։

«Նաև ՀՀ կառավարությունը՝ ի դեմս ԱԳՆ-ի, հանդես է եկել հստակ գնահատականներով և շարունակելու ենք մեր ջանքերը՝ խնդիրը հասցեագրելու ուղղությամբ։ Մեր դիվանագիտությունն անում է այն, ինչ հնարավոր է՝ առաջնորդվելով չվնասելու սկզբունքով»,-ասաց նա։

Իսկ թե ինչու չեն երևում այդ ջանքերը, Փաշինյանը պարզաբանեց, որ ինքն այդ հարցին բերում է 2023 թվականի դեկտեմբերի օրինակը, երբ գերեվարված մեր 32 հայրենակիցները վերադարձան ՀՀ․ «Մինչև պաշտոնական հայտարարության վերջին վայրկյանը որևէ մանրամասն չենք բացահայտել, որովհետև դրանք նաև կզրոյացնեին նախկինում գործադրված ջաքերը և արդյունավետության հավանակությունը»։

Փաշինյանը կրկնեց՝ Բաքուն արգելված միջոցներ է կիրառում գերիների նկտմամբ, այդ թվում՝ ֆիզիկական, հոգեբանական ճնշման գործիքներ, ինչն անընդունելի է։

Նա նաև նշեց, որ եթե այդ տեսարանները Բաքուն օգտագործում է հանրության նկատմամբ հոգեբանական ներգործություն ունենալու համար և դա ներգործություն ունենում է, «նշանակում է՝ նրանք իրենց խնդիրը կատարում են»։