Ինչպես շքեղության հանդեպ սերը Զիմբաբվեի առաջին տիկնոջը տարավ տնային կալանքի

Զիմբաբվեի առաջին տիկին Գրեյս Մուգաբեին այլ կերպ անվանում են Գուչչի Գրեյս կամ Առաջին գնորդուհի։ Առատորեն ծախսելու նրա սովորությունը մարդկանց զանգվածներին տրամադրել է իր դեմ։ Գրեյս Մուգաբեն Զիմբաբվեի առաջին տիկին է դարձել 1996 թվականին, մինչ այդ նա եղել է նախագահի քարտուղարուհին։ Նրանք երկուսն էլ այդ ժամանակ ամուսնացած են եղել, սակայն նախագահի առաջին տիկնոջ՝ Սալլի Հեյֆրոնի մահից հետո, Գրեյսը լքել է ամուսնուն ու ամուսնացել պետության ղեկավարի հետ։ Նրանք համատեղ որդի ունեն։ 2003 թվականին նա Փարիզում շոփինգի ժամանակ ծախսել է 120 հազար դոլար։ Մուգաբեի դստեր`Բոնա Մուգաբեի և օդաչու Սիմբա Չիկորեի հարսանիքն արժեցել է 4 մլն դոլար։ Մայրաքաղաք Հարարեում մի ճանապարհի վերանորոգման վրա, որը տանում է կառավարության տնից Մուգաբեի առանձնատուն, ծախսվել է մոտ 1 մլն դոլար։ Միայն 2014 թվականին Գրեյսը մի ողջ կարողություն էր ծախսել։ Նա ձեռք էր բերել 12 ադամանդե մատանի, Ferragamo-ից 62 զույգ կոշիկ և 106 հազար դոլարանոց Rolex։ Նախագահի որդին՝ Չատուգան, նույնպես հայտնի է շքեղության հանդեպ իր սիրով։ Չատունգան Instagram-ում հրապարակել էր իր ձեռքի լուսանկարը։ Ձեռքին եղել են ոսկե ժամացույց, մատանի և ապարանջան։ Նկարն ուղեկցվել է հետևյալ գրությամբ. «60 հազար դոլար դաստակիդ, երբ հայրդ կառավարում է ողջ երկիրը»։ Օրերս 93-ամյա Ռոբերտ Մուգաբեն և նրա կինը՝ 52-ամյա Գրեյս Մուգաբեն, կալանավորվել են։ Ներկայում նրանք տնային կալանքի տակ են գտնվում Հարարեի իրենց Blue Roof առանձնատանը, որը կազմված է 25 սենյակից։ Պատրաստեց 1in.am-ը