Փաստաբանը Սամվել Բաբայանին արդարացնել պահանջեց

Արդեն տեղեկացրել ենք,որ Կենտրոն և Նորք Մարաշ վարչական շրջանների ընդհանուր իրավասության դատարանում Սամվել Բաբայանի և մյուսների գործով դատական նիստում այսօր ամբաստանյալները պետք է հանդես գային  պաշտպանական ճառերով: Ճառը ներկայացրեց Բաբայանի փաստաբան Ավետիս Քալաշյանը և հայտարարեց:Նա իր  պաշտպանյալին առաջադրված մեղադրանքները անհիմնհամարեց: «Սանասար Գաբրիելյանը դատավարության ընթացքում բազմիցս ասել է, որ բանակի համար նպատակ է ունեցել ձեռք բերել Իգլա տեսակի զենիթահրթիռային համալիր՝ իր սեփական միջոցներով, և զենքի համար գումար Բաբայանը չի տրամադրել: Ձեռք բերված զենքը պլանշետով լուսանկարել են և ցույց տվել Սամվել Բաբայանին: Վերջինը ասել է, որ ամբողջական չէ:Բաբայանի առնչությունը այդ ամենին ընդամենը եղել է որպես խորհրդատու:Եթե Գաբրիելյանի ցուցմունքներին նշանակություն տրվեր, ապա Բաբայանի նկատմամբ նման մեղադրանք չէր առաջադրվի:Մեղադրանքի հիմքում դրված այն ձևակերպումները, որ Բաբայանը դրդել է Գաբրիելյանին զենք ձեռք բերել, նյութապես շահագրգռելու եղանակով զենքը ձեռք բերելու համար վճարել գումար, չի հաստատվում որևէ փաստական հանգամանքով», - հայտարարեց փաստաբանը: Նրա խոսքով՝ մեղադրանքը կառուցված է ենթադրությունների հիման վրա, չկան փաստական ապացույցներ: Անդրադառնալով ԱԱԾ-ի կողմից ներքին զննման օպերատիվ գաղտնալսումներին՝  Քալաշյանն ասաց, որ այդ գաղտնալսումներում, որտեղ առկա են Բաբայանի խոսակցությունները, որևէ կերպ Բաբայանի կողմից չի հիշատակվում գումարը, դրա չափը և  ըստ փաստաբանի, նշված գործողությունների արդյունքում ձեռք բերված տվյալները անհիմն են: Փաստաբանի մոտ առաջադրված մեղադրանքից մի քանի հարց է առաջացել. «Եթե զենքի պատվիրատուն Բաբայանն է, եթե  նա պետք է վճարեր դրա դիմաց, ապա Սանասար Գաբրիելյանը ինչո՞ւ է հրաժարվել այն ձեռք բերելուց, հատկապես այն պարագայում, որ Գաբրիելյանը նյութապես շահագրգռված է եղել: Չէ՞ որ, այսպես կոչված, պատվիրատուն նման հրահանգ չի տվել: Բաբայանի և Գաբրիելյանի զրույցում որևէ տվյալ չկա, որ Բաբայանի հրահանգով է Գաբրիելյանը հրաժարվել զենքի մասերը ձեռք բերելուց: Նշված փաստարկներից միանշանակ հետևում է, որ Սամվել Բաբայանը որևէ առնություն չունի զենքի հետ, դրա նախաձեռնությունը Գաբրիելյանինն է, որին Բաբայանը որևէ խոստում չի տվել»: Քալաշյանը ռազմամթերքի ապօրինի շրջանառության փորձի մեղադրանքի մասով  միջնորդեց արդարացում Բաբայանի համար.«Սամվել Բաբայանն անուրանալի օգուտ է տվել երկրին ծանր իրավիճակում: Ի վերջո, հարգելի դատարան, մենք գործ ունենք հերոսի հետ»: